Ил Түмэн бочуотунай грамотатыгар бэриллэр кыһыл көмүс чаһы оннугар наҕарааданааччылар аны анал бэлиэни тутуохтара. Бүгүн Ил Түмэн пленарнай мунньаҕар депутаттар Судаарыстыбаннай мунньах наҕараадатын сокуонугар уларытыылары киллэрдилэр.
Санатан эттэххэ, Ил Түмэн бочуотунай грамотатыгар кыһыл көмүс чаһы 2010 сылтан көрүллэр этэ. Бу наҕараада киһиэхэ судаарыстыбаннас, парламент, олохтоох салайыныы, өрөспүүбүлүкэ социальнай-экономическай, научнай-техническэй, култуурунай сайдыытыгар, наукаҕа, литератураҕа, искусствоҕа, доруобуйа харыстабылыгар, үөрэххэ, ыччат бэлиитикэтигэр кылаатын иһин бэриллэр.
Депутаттар мунньахха иһитиннэрбиттэринэн, чаһыны анал бэлиэҕэ уларытыы бүддьүөккэ кэмчилээһини таһаарыаҕа. “Кыһыл көмүс чаһы оннугар түөскэ кэтиллэр анал бэлиэ оҥоһуллуоҕа. Бу уларыйыы кыһыл көмүскэ сыана ыараабытынан киирдэ”, – диэн бэлиэтиир судаарыстыбаннай тутулга, олохтоох салайыныыга сис кэмитиэт бэрэссэдээтэлэ Владимир Прокопьев.
Сокуон барылын Ил Дархан Айсен Николаев өйөөн турар. Бүгүҥҥү мунньахха норуот депутаттара сокуон барылын бүтэһиктээх ааҕыынан ылыннылар.
Аграфена КУЗЬМИНА