«Кыһын Саха сириттэн саҕаланар» диэн олус суолталаах бэстибээл өрөспүүбүлүкэбитигэр туризм сайдыытыгар сүҥкэн кылаатын киллэрэр.
Чысхаан уонна Тымныы Моруос оҕонньор аан бастаан 2012 сыллаахха «Строганина» бэстибээлгэ көрсүбүттэрэ. Ол кэмҥэ Моруос оҕонньор Арассыыйа устун айаҥҥа туруммута. Онно кини аан бастаан Саҥа дьыллааҕы харыйаны умаппыта, Тымныы символын Чысхаантан туппута уонна салгыы дойду эрэгийиэннэригэр Кыһыны «илдьэ барбыта». Ол кэмтэн ыла 7 сыл устата тохтоло суох ыытыллыбыт бэстибээл Саха сиригэр туризмы сайыннарыыга улахан хардыыны оҥордо.
Кыһыҥҥы туризм бэстибээлэ Саха сиригэр, Арктикаҕа олорор хотугу норуоттар ураты дьикти култуураларын, астарын-үөллэрин, ускуустубаларын сайдыытыгар олус улахан болҕомтону тарта. Ол да иһин буолуо, 2016 сыллаахха «Кыһын Саха сириттэн саҕаланар» тэрээһин Ярославль куоракка ыытыллыбыт «Russian Event Awards-2016» дойду событийнай туризмын бэстибээлигэр «Норуот үгэһин уонна култууратын тарҕатыыга бастыҥ туристическай тэрээһин» диэн номинацияҕа Национальнай бириэмийэ Гран-При наҕараадатынан бэлиэтэммитэ. Билигин «Кыһын Саха сириттэн саҕаланар» кыһыҥҥы туризм бэстибээлэ Арассыыйа 5 топ-бастыҥ тэрээһинин ахсааныгар сылдьар. Тэрээһиҥҥэ Арассыыйа бары эригиэйэннэриттэн, Японияттан, Кытайтан, Кореяттан, Монголияттан уо. д.а. омук дойдуларыттан элбэх ахсааннаах суруналыыстар, киинэ устааччылар, блогердар, туризм индустриятын салайааччылара кэлэн кытталлар.
Быйылгы «Кыһын Саха сириттэн саҕаланар» кыһыҥҥы туризм бэстибээлин кэмигэр, сэтинньи 27 күнүгэр, IT-Пааркаҕа «Саха сиригэр туризм сайдыытыгар кыһын уобараһа» диэн бэрт интэриэһинэй төгүрүк остуол ыытыллыаҕа.
Сэтинньи 28 күнүгэр «Арктическай туризм» диэн хотугу улустары кытта быһа сибээһинэн сүбэ-мунньах буолуоҕа. Эмиэ бу күн «Саха сиригэр оҥоһулунна» диэн кэмпириэнсийэ ыытыллыаҕа.
Сэтинньи 29 күнүгэр «Тымныы килиимэт усулуобуйатыгар этническэй аһааһын култуурата» диэн III кэмпириэнсийэ ыытыллыаҕа. Маны тэҥэ, бу күн эрэстэрээн уонна гостиница биисинэһигэр үлэлиир урбаанньыттар бу салаа сайдыытыгар туһуламмыт төгүрүк остуолу уонна сэминээри ыытыахтара.
Елена ПОТОЦКАЯ, «Саха сирэ» хаһыат, edersaas.ru
Хаартыска: интэриниэттэн уонна ааптар түһэриитэ.