Кыһыҥҥы сынньалаҥ кэнниттэн үөрэх туһунан

Ааптар: Эдэр Саас

Бөлөххө киир:

СӨ Үөрэх уонна наука министиэристибэтэ иһитиннэрбитинэн, 2021 сыл тохсунньу 11 күнүттэн өрөспүүбүлүкэ 606 оскуолатыгар үөрэх саҕаланар.

Улуустааҕы үөрэх управлениеларын быһаарыыларынан, 51 оскуолаҕа кыһыҥҥы сынньалаҥнар салҕаналлар (Булуҥ улууһугар — 3 оскуолаҕа: Тиксии уонна Арктика орто оскуолаларыгар тохсунньу 13 күнүгэр, Бороҕон орто оскуолатыгар тохсунньу 19 күнүгэр диэри. Ленскэй оройуоҥҥа — 17 оскуолаҕа тохсунньу 13 күнүгэр диэри. Өймөкөөн улууһугар — 4 оскуолаҕа: Төрүт, Үчүгэй, Уус Ньара орто оскуолаларыгар тохсунньу 12 күнүгэр, Уус Ньара гимназиятыгар тохсунньу 13 күнүгэр диэри. Өлөөн оройуонугар — 1 оскуола тохсунньу 12 күнүгэр диэри. Чурапчы улууһугар — 26 оскуола тохсунньу 12 күнүгэр диэри).

Оскуолалар 30% күнүскү киэбинэн (очнай форма), 45% уопсай үөрэхтээһин тэрилтэлэрэ үөрэҕи күнүскү-кэтэхтэн (очно-заочнай форманан), 25% оскуола дистанционнайынан үөрэхтэрин салгыахтара.

Саҥа дьыллааҕы сынньалаҥҥа тулаайах оҕолор интэринээттэригэр 79 оҕо хаалбыта. Интэринээккэ үөрэхтэригэр кэлэр оҕолор коронавирус инфекцията суоҕун туһунан ыспыраапкалаах буолуохтаахтар.

«Ытыктабыллаах преподавателлэр, төрөппүттэр уонна үөрэнээччилэр. Оҕо саадтарыгар, оскуолаларга, орто анал уонна үрдүк үөрэх кыһаларыгар хоруона хамсыгын бохсор туһуттан, СӨ Үөрэх уонна наука министиэристибэтинэн өрөспүүбүлүкэ бары оройуоннарынан күн ахсын мониторинг ыытыллар, суһал ыстаап санитарнай ирдэбил тутуһуллуутун хонтуруоллуур. Дьаҥ-дьаһах тарҕамматын, куттал суох буоларын туһугар бары миэрэлэри тутуһаргытыгар көрдөһөбүт, бэйэҕитин, чугас дьоҥҥутун харыстааҥ«, — диэн СӨ Үөрэх уонна наука министиэристибэтин пресс-сулууспата иһитиннэрэр.

Хаартыска: СИА