«Якутоптторг» АУо өрөспүүбүлүкэ хоту улуустарын сэргэ, суола-ииһэ мөлтөх нэһилиэнньэлээх пууннары социальнай суолталаах аһынан-үөлүнэн хааччыйар.
Буола турар балаһыанньаттан сылтаан, хампаанньа сорох филиалларыгар бу күннэргэ саахары, бурдугу уонна ириис куруппатын куулунан атыыласпыттар. Бу атыылаһааччылар үксүлэрэ «перекупщиктар» буолаллар. Балар, хомойуох иһин, кууһунан элбэҕи ылан баран, кэлин үрдүк сыанаҕа атыылыахпыт диэн хаһааналлар. Ол иһин, «Якутоптторг» АУо салалтата бу күннэргэ саахары, бурдугу кууһунан атыылыыры боппут. Бу — саамай сөптөөх дьаһаныы. Тэрилтэ филиаллара тустаах бородуукталары 1-2 киилэнэн атыылыы тураллар. Маннык тэринии, бастакы уочарат, сыананы үрдэппэт уонна нэһилиэнньэ бары араҥата тиксэр кыахтанар.
Билигин хоту уонна Арктика улуустарыгар киилэ бурдук 52,2 солк. буолбут, бу урукку сыанаттан 8 солк. үрдээбит. «Якутоптторг» АУо пресс-сулууспата иһитиннэрбитинэн, килиэп сыанатын үрдэппэт сыалтан, хоту уонна Арктика улуустарыгар бурдугу кууһунан атыыланар сыанатын үрдэппэт сорук ылыныллыбыт. Манна биири өйдүөххэ наада. «Якутоптторг» АУо социальнай суолталаах бородууктаны хотугу улуустарга тиэрдии ороскуотун быһаарыыга эрэ субсидияны ылар. Оттон атын табаардары урбаанньыттар бэйэлэрин үптэринэн таһаллар.
Тустаах хампаанньа иһитиннэрбитинэн, Арктика улуустарын нэһилиэнньэтин 12 ый устата хааччыйарга сөптөөх социальнай бородуукта тиэрдиллибит. Билигин кыһыҥҥы суолу баттаһа тустаах үлэ күүскэ бара турар. Ол курдук, кулун тутар бүтүөр диэри Арктика уонна хоту улуустарга барыта 5 тыһ. туонна кэриҥэ социальнай суолталаах бородуукта тиэрдиллиэҕэ.
Хаартыска: СИА