Араҥастаах оҕо дьиэтэ Ньурбаҕа өссө Аҕа дойдуну көмүскүүр сэрии сылларыттан тулаайах хаалбыт оҕолору көрөн-истэн, 7 кылаастаах оскуолаҕа үөрэтэн, киһи-хара оҥортообута. Маннааҕы интэринээттэн хаһан эрэ Николай Чуор, Степан Федотов, Сиэн Чолбодук, Иннокентий Тарбахов олох киэҥ аартыгар куорсун анньынан тахсыбыттара. Оччотооҕу аас-туор, аччык кэмнэртэн олохпут таһыма төһө даҕаны биллэ тупсубутун, ас-үөл, таҥнар таҥас, туттар сэп-сэбиргэл дэлэгэй буолбутун иһин, ийэ-аҕа истиҥ тапталыттан маппыт, сылаас сыһыаныттан атарахсытыллыбыт оҕолор билигин да бааллар.
edersaas.ru
37 сыл педагогическай үлэ ыстаастаах Анна Васильевна Петрова Ньурбатааҕы «Арчы» социальнай-реабилитационнай киин Араҥастаахха баар филиалын, оҕо дьиэтин дириэктэрэ. Кини эмиэ бу интэринээккэ улааппыта.
«Кыһалҕаны билэн улааппыт оҕо сүрдээх тулуурдаах, дьулуурдаах, кытаанах санаалаах үтүө киһи буолар. Барыта бэлэмҥэ сылдьар оҕолортон чыҥха атын, олоҕор элбэҕи ситиһэр», — диир Анна Васильевна.
Кини билигин сүрэҕин истиҥ иэйиитин, ийэ тапталын интэринээт оҕолоругар аныыр, олоҕун бүүс-бүтүннүү кинилэри кытта ситимниир. СГУ нуучча тылын салаатын бүтэрэн баран, аҕыйах сыл Чурапчыга үлэлии сылдьыбыта, онтон дойдутугар эргиллэн кэлэн, Араҥастаахха учууталлыыр, 2003 с. дириэктэринэн ананар. Тыл идэлээх киһи устар ууну сомоҕолуур, хомоҕой тыллаах хоһоону сөбүлүүр буолан, иитиллээччилэрин эмиэ норуот уус уран айымньытыгар: олоҥхоҕо, чабырҕахха, ырыаҕа-хоһооҥҥо эрчийэр, сыаҥка туруораллар.
Кини үөрэтэр оҕото Вова Иванов «ЮНЕСКО» анал бирииһигэр тиксибитэ, «Дети Азии» уонна Ньурбаҕа Олоҥхо ыһыаҕын арыйыытыгар кыттыбыта. Чурапчыга эмиэ олоҥхолоон, 60 оҕоттон бастакы миэстэни ылбыта.
Манна тулаайах, көрүүтэ суох хаалбыт, эбэтэр кыаммат, аҥаардас ийэ-аҕа, араас биричиинэнэн ийэ быраабыттан матаары сылдьар төрөппүттэр оҕолорун аҕалаллар. Араҥастаахха сэттэлэриттэн уоннарыгар диэри саастаах оҕолор сылдьаллар, онтон салгыы «Арчы» көрүүтүгэр киирэллэр.
“Аан бастаан кэлбит оҕолору дуоска иннигэр эппиэттэтэ ыҥырдахха, кыбыстан олох саҥарбаттар. Ол иһин, сөбүлүүр оруолларын биэрэн оонньуу курдук сыаҥка туруоран, саҥарарга, ис санааларын этэргэ үөрэтэбит. Кэмиттэн кэмигэр оҕону хайгыыбыт, оччоҕуна, үөрэн-көтөн, түргэнник аһыллар. Олоҥхону уруһуйдаан, остуоруйа курдук кэпсээн, интэриэстэрин тардабыт. Араас ньыманан оҕолор бэйэ-бэйэлэрин кытта күрэхтэһэллэр.
Хас биирдии оҕо талаанын арыйарга дьулуһабыт. Биһиги оҕолорбут тыйаатыр иһинэн анал куруһуокка дьарыктанан, киинэҕэ уһуллаллар. Оҕолор оруолларын бэйэлэрэ талан ылаллар, таҥастарын уларыттылар да бэрт кэбэҕэстик уобараска киирэллэр”, — диэн кэпсиир салайааччылара Анна Васильевна.
Марианна ТЫРТЫКОВА, «Саха сирэ», edersaas.ru