Дьокуускайга Суорун Омоллоон аатынан Опера уонна балет тыйаатырыгар Саха Өрөспүүбүлүкэтин муниципальнай тэриллиилэрин бэрэстэбиитэллээх уорганнарын дьокутааттарын бастакы сийиэһэ үлэтин саҕалаата. Сийиэс сүрүн соругунан бэрэстэбиитэллээх уорган дьокутаатын үлэтин көдьүүһүн үрдэтэр тосхоллору быһаарыы, өрөспүүбүлүкэ олоҕо-дьаһаҕа, экэниэмикэтэ сайдыытыгар муниципальнай тэриллии суолтатын өйдөтүү, үрдэтии буолар.
Роман Попов, “Саха сирэ” хаһыат, https://edersaas.ru
Бу иннинээҕи күннэргэ сийиэс кыттыылаахтарыгар анаан семинардар, “төгүрүк остуоллар” ыытыллыбыттара. Онно дьокутааттар бэйэлэрин кыһалҕалаах боппуруостарыгар экспертэр, практиктар, учуонайдар уонна исписэлиистэр сүбэлэрин ылбыттара. Олохтоох салайыныы уорганнарын үлэтин кэккэ боппуруостара Ил Түмэн иһинэн үлэлиир муниципальнай оройуоннар уонна куораттааҕы уокуруктар бэрэстэбиитэллээх уорганнарын бэрэссэдээтэллэрин Сэбиэтэ, олохтоох салайыныы Бүтүн Арассыыйатааҕы Сэбиэтин Саха сиринээҕи салаата уонна Саха Өрөспүүбүлүкэтин муниципальнай тэриллиилэрин Сэбиэтэ – муниципалитеттар икки ардыларынааҕы бииргэ үлэлээһин ассоциацията ыыппыт көрсүһүүлэригэр киэҥник дьүүллэһилиннилэр.
Онно элбэх кэпсэтии “Арассыыйа Федерациятын тустаах сокуон суолталаах аакталарыгар уларытыылары киллэрэр туһунан” 2015 сыл сэтинньи 3 күнүнээҕи федеральнай сокуон тула барда. Ити сокуон ирдэбилинэн, муниципальнай тэриллии дьокутааттара сыл аайы дохуоттарын, баайдарын-дуолларын уонна баайга-дуолга сыһыаннаах эбэһээтэлистибэлэрин туһунан сибидиэнньэ түһэриэхтээхтэр. Ол эрээри, Саха Өрөспүүбүлүкэтин муниципальнай тэриллиилэрин Сэбиэтин 2017 сыл тохсунньу 1 күнүнээҕи туругунан, 5002 дьокутааттан 479 киһи дохуотун туһунан декларацияны түһэрбэтэх. Манна үгүс сиргэ айан-сырыы суоҕа, суол-иис мөлтөҕө, айан ороскуота үрдүгэ, сорох тыа сиригэр кирэдьиит биэрэр тэрилтэ суоҕа уонна да атын төрүөттэр декларацияны кэмигэр туттарарга улахан мэһэй буолалларын сокуон аахсыах кэриҥнээҕэ ыйылынна. Декларацияны туттарыы үксүгэр үп-харчы өттүнэн ороскуоттааҕа, өй-санаа өттүнэн баттыктааҕа бэйэтэ да кыра дохуоттаах киһини дьокутаат буолартан туттунарга күһэйэрэ баар суол.
Сийиэскэ дакылаатыгар Ил Түмэн бэрэссэдээтэлэ Александр Жирков бу тиэмэни таарыйан, Саха Өрөспүүбүлүкэтин Ил Түмэнэ, баар кыһалҕаны өйдөөн, 2017 сыл олунньу 28 күнүгэр РФ Федеральнай Мунньаҕын Федерациятын Сэбиэтин бэрэссэдээтэлигэр В.И. Матвиенкоҕа уонна РФ Федеральнай Мунньаҕын Судаарыстыбаннай Дууматын бэрэссэдээтэлигэр В.В. Володиҥҥа тыа сиринээҕи түөлбэ (поселение) бэрэстэбиитэллээх уорганын дьокутаата дохуотун, баайын-дуолун уонна баайга-дуолга сыһыаннаах эбэһээтэлистибэтин туһунан сибидиэнньэни, ону тэҥэ, кэргэнин (кэргэттэрин) уонна сокуоннай саастарын саастарын ситэ илик оҕолорун дохуоттарын, баайдарын-дуолларын уонна баайга-дуолга сыһыаннаах эбэһээтэлистибэлэрин туһунан сибидиэнньэни түһэриитигэр туһааннаах этиини киллэрбитин эттэ. Онно Ил Түмэн тыа сирин түөлбэтин бэрэстэбиитэллээх уорганын дьокутааттара дохуоттарын туһунан декларацияны түһэрэр болдьохторун уһаттахха, биитэр маннык эбээһинэстэн босхолоотоххо, бу кыһалҕа быһаарыллыан сөбүн ыйбыта.
Федеральнай сокуону оҥорооччу бу боппуруоска ханнык-туох быһаарыыны ылыныаҕын билиҥҥитэ этэр уустугун ыйан туран, Ил Түмэн бэрэссэдээтэлэ декларацияны түһэрэр эбээһинэс – судаарыстыба хоруупсуйаны утары ыытар бэлиитикэтин биир сүрүн хайысхата буоларын өйдөөн, баар сокуон халбаҥа суох толоруллуохтааҕын эттэ.
Роман Попов, “Саха сирэ” хаһыат, https://edersaas.ru