Биир 70-чалаах эмээхсини өйдөөн хаалбыппын. 80-с сылларга куоракка олохсуйа киирбитин туһунан кэпсээбитэ:
— Оччолорго үлэни кыайар этим. Хас эмэ сиргэ үлэлиирим. Дьиэм суох буолан куортамнаһабыт. Бэйэбин кытта кыргыттарым бааллар. Биирдэрэ алын кылааска, биирдэрэ орто сүһүөххэ үөрэнэллэр. Мин үлэбиттэн сороҕор оҕолорум утуйбуттарын кэннэ кэлэбин. Биирдэ кэлбитим улахан кыыс, уотун аһан баран, куукунаҕа олорор эбит. Тоҕо утуйбакка олороҕун диэн мөҕүтүннүм. Онуоха кыыһым саҥарыма диэн баран илиитин чочоҥнотор уонна түннүгү ыйар. Куортамнаабыт дьиэбит бастакы этээс этэ. Мин тиийэн сабыыны арыйан көрдүм, туох да суох. Кыыспын кытта дьыбааммар утуйдум. Сарсыныгар ыйыталастым да, тугу да эппэтэ. Онтон биир подъезка олорор ыалбыт оҕонньор өллө диэн буолла. Ыаллыылар буолан, син «дорообо», «дыраастый» диэн билсэр ыалбыт этэ. Улахан кыыспын тахсыах диэн этэн көрдүм да, аккаастаата. Кэлин биир ый ааспытын кэннэ кыыһым кэпсээтэ.
Арай утуйа сыттаҕына, ким эрэ суорҕаныттан тардыалаабытыгар уһуктан кэлбит. Уутугар аҥаарыйан баран куукунаҕа тахсыбыта түннүк аттыгар биир күлүк курдук киһи турар үһү. Кыыһым кимҥиний диэн ыйыппытыгар оргууй эргиллибит. Уонна кып-кыһыл харахтарынан кыыспын батары көрбүт. Онуоха кыыһым хаһыытаат, уоту аспытыгар сүтэн хаалбыт. Оҕом кутталыттан хамсыыр да кыаҕа суох дөйөн олордоҕуна, мин киирэн кэлбиппин.
Ол дьиэттэн сотору буолаат көспүппүт, тэскилиир ордук эбит.
Надежда Логлоҕор, «Чулуу кылгас кэпсээннэр» («Айар», 2023 с.)
кинигэттэн быһа тардан.
