Сайдыы тэтимнээх хардыытынан, Сахабыт сиригэр, аны, «Кванториум» мобильнай технопаарка кэлиитэ буолла.
Бүтүн көлөҕө үөрэтэр тэрил баара уонна улуустарынан көһө сылдьан кэнчээри ыччакка билиини-көрүүнү хаҥатарга көмөлөөҕө, табыгастааҕа бэлиэтэнэр. Өйдүүр инигит, быйыл күһүн үөрэнээччилэри, кырачаан оҕолору суол-иис быраабылатыгар үөрэтэр, сэрэхтээхтик сылдьыыны билэллэригэр такайар эмиэ араас тэриллээх көһө сылдьар сыалай көлө кэлбитин. Оттон бу сырыыга, өрөспүүбүлүкэҕэ эмиэ аан бастакытын «Кванториум» мобильнай технопааркаланныбыт. Бу «Үөрэхтээһин» национальнай бырайыак иитинэн буоларын «Юные Якутяне» өрөспүүбүлүкэтээҕи рөсурснай киин бэлиэтиир. Быйыл бу «Кванториум» Мэҥэ Хаҥалас, Уус Алдан, Бүлүү, Үөһээ Бүлүү, Нам улуустарынан уонна Дьокуускай куорат таһыгар сылдьан үөрэтиэ диэн сырдаталлар.
«Кванториум» мобильнай технопаарка — бу көлөнөн көһө сылдьар ыстаансыйа. Үрдүк технологиялаах, үөрэтэр-производственнай, лабораторнай тэриллэринэн хааччыллыылаах, бырагыраамалаах, үөрэтэр литературалаах. Көһө сылдьар «Кванториумҥа» оҕолору промышленнай дизайн, промышленнай робототехника, информационнай технологиялар, аэро-технологиялар, геоинформационнай технологиялар хайысхаларыгар, о.д.а. үөрэтиэхтэрэ. Бу ыраах олорор тыа сирдэрин оҕолоро эбии үөрэхтээһининэн хааччыллалларыгар, кинилэргэ научнай-тэхиньиичэскэй интэриэһи үөскэтэр, ону сэргэ, тэхиньиичэскэй идэҕэ угуйар соруктаах тэриллибит.
«Көлүөһэлээх технопаарканы»билиһиннэрии үөрүүлээх тэрээһинигэр СӨ үөрэх уонна наука миниистирин солбуйааччы Владимир Тихонов, ресурснай киинтэн уонна Ф.И.Авдеева аатынан оҕо айымньытын дыбарыаһыттан салайааччылар кытыннылар. Докумуона толоруллубутун кэнниттэн, мобильнай технопаарка Дьокуускайга «Кванториум» оҕо технопааркатыгар бэриллэр. Ол кэнниттэн улуустарынан айаҥҥа турунар.
Быһаарыы:
Арассыыйа 15 субъегар, билиҥҥи туругунан, «Кванториум» 15 мобильнай технопаарката үлэлиир. Оттон сыл түмүктэниэр диэри, тыа сиригэр уонна кыра куораттарга олорор оҕолорго анаан, РФ 70 субъегар 85 мобильнай технопаарка үлэлиэҕэ.
+1
+1
+1
+1
+1
+1
+1