Алтынньы 11 күнүгэр Кыргыттар аан дойдутааҕы күннэрэ ХНТ (ООН) көҕүлээһининэн 2012 сылтан бэлиэтэнэр. Бу күн кэнэҕэскитин ыал ийэлэрэ буолуохтаах кыргыттары иитии боппуруостарыгар, кинилэр бырааптарын көмүскүүргэ, итиннэ сыһыаннаах социальнай кыһалҕаларга уопсастыба болҕомтотун тардарга анаммыт. Сыл аайы ыытыллар тэрээһиннэр тиэмэлэрэ араас буолар. Холобур, быйыл кириисис кэмигэр кыргыттар бырааптарын көмүскээһин боппуруостарыгар болҕомто туһаайыллар. Аан дойду үрдүнэн кыыс ахсаана 1,1 млрд буоллаҕына, Саха сиригэр сыл аайы 8 тыһыынча кэриҥэ кыыс оҕо күн сирин көрөр.
Бу күн чэрчитинэн Дьокуускайга “Куукуланы бэлэхтээ” аһымал ааксыйа ыытыллар. Кыыс оҕолорун соҕотоҕун иитэр аҕалары өйүүр сыаллаах ааксыйа “Туймаада” атыы-эргиэн киинигэр баар “Планета Кидска” сарсыарда 11 чаастан саҕаланыа.
Бу манна кыракый кыргыттар оонньуур аптамааттарга босхо оонньуохтара-көрүлүөхтэрэ, 11 саастарыттан обургу кыргыттарга «TAYAMODELS» модельнай агентство салайааччыта туттарга-хаптарга, подиумҥа хаамарга үөрэтэр маастар-кылаас ыытыаҕа. Оҕолору аниматордар оонньотон сэргэхситиэхтэрэ, куукулалары, бэлэхтэри биэрэн үөрдүөхтэрэ. Оттон психолог Яна Иванова бу кэмҥэ аҕаларга олох очурдарын хайдах туоруур туһунан лиэксийэ-бэсиэдэ ааҕыаҕа.
Кыргыттар аан дойдутааҕы күннэрин Арассыыйаҕа 2014 сылтан бэлиэтиир буолбуттара. Оттон Саха сиригэр Дьокуускай куорат дьаһалтата, “Дьокуускай куорат дьахталларын лигалара” уонна “Планета Кидс” ХЭТ маннык тэрээһини былырыын эмиэ ыыппыттара уонна сыллата үгэскэ кубулутар санаалаахтар. Маны таһынан, араас куонкурустар, быыстапкалар, көрсүһүүлэр, поликлиникаларга аһаҕас аан күннэрэ, о.д.а. ыытыллыахтара.
Ангелина Васильева, “Саха сирэ” хаһыат, edersaas.ru