«Кутуруктаммыт» эбийиэктэри тутуу бытааннык да буоллар, ыытылла турар. «Северная строительная компания» ХЭУо хас да сылы быһа сыһа-соһо сылдьыбыт дьиэтин бастакы уочарата сотору тутуллан бүтүөхтээх. edersaas.ru
Маны таһынан «Пекарскай» ЖСПК (урукку «Стерх» ЖСК), «Теплосервис» ХЭТ А-Б блоктара уонна «Макрос» ХЭТ икки дьиэтин салгыы тутан үлэҕэ киллэрии соруга туруоруллубута. Бу сыалга анаан судаарыстыба бүддьүөтүттэн 50 мөл. солк. үбүлээһин оҥоһуллубута. Инньэ гынан сыл бүтүөр бу дьиэлэр үлэҕэ киллэриллиэхтээхтэрин туһунан СӨ бырабыыталыстыбатын бэрэссэдээтэлин солбуйааччы Игорь Никифоров иһитиннэрдэ. Ааспыт нэдиэлэҕэ вице-премьер дольщиктары кытары көрсөн кэпсэппитэ.
«Северная строительная компания» ХЭУо (Дьокуускай к., Каландаришвили уул. 66 №-рэ) кыттыгас тутааччыларын көҕүлүүр бөлөҕүн кытары көрсүһүүгэ, дольщиктар тутууну ыытарга эбии харчы хомуйбуттарын туһунан иһитиннэрдилэр.
Төһө даҕаны ыарахаттар үөскээбиттэрин үрдүнэн, кыттыгас тутааччылар бырабыыталыстыба көмөтүнэн олорор дьиэлэрин ахсынньыга киллэрэр былааннаахтар. Кэтэспиттэрэ, күүппүттэрэ да ыраатта.
Анивера Акимова, «Саха сирэ» хаһыат, edersaas.ru