«Куттала суох уонна хаачыстыбалаах айан суола» национальнай бырайыагынан 20 эбийиэги туттарыахтара
Бу күннэргэ өрөспүүбүлүкэҕэ хапытаалынай өрөмүөн кэнниттэн эрэгийиэннээҕи суоллары тутуу ыытылла турар. Былаан быһыытынан суол хаһаайыстыбатын үлэһиттэрэ балаҕан ыйын иккис дэкээдэтин бүтүүтүгэр саҥардыллан оҥоһуллубут 50 км суолу туттарыахтаахтар.
edersaas.ru
Балаҕан ыйын саҥатыгар бэдэрээтчит тэрилтэлэр, ол иһигэр «ИнвестДорСтрой» ХЭТ уонна МУАД АК «АЛРОСА» (ПАУо) уопсайа 30 км уһуннаах суолу өрөмүөннээн туттарбыттара. Ол курдук үлэ «Нам» (5 км) уонна «Анаабыр» суолларыгар (25 км) ыытыллыбыттара. Бу күннэргэ «Дьааҥы» суолугар 20 км суол өрөмүөннэнэн бүттэ. Билигин миэстэтигэр Управтодор хамыыһыйата үлэлиир.
Бу ыйга суол хаһаайыстыбатын үлэһиттэрэ уопсайа 30 км уһуннаах 7 учаастагы туттарыахтаахтар. Хаҥалас, Ленскэй, Өлүөхүмэ, Мэҥэ Хаҥалас, Нам, Томпо уонна Таатта улуустарыгар.
Эрэгийиэннээҕи суолларга өрөмүөн үлэтэ алтынньыга эмиэ ыытыллыахтаах. Онон бу сыл бүтүөр диэри «Куттала суох уонна хаачыстыбалаах айан суола» национальнай бырайыагынан 180 км суол туттарыллыахтаах.
edersaas.ru