Сүрүн Уопсастыба

Куттал суох буолуу тойоно кэллэ



РФ Куттал суох буолуутун сэбиэтин сэкирэтээрэ Николай Патрушев бүгүн Дьокуускайга Уһук Илин регионнарын салайааччыларын, туһааннаах биэдэмистибэлэри мунньан демография, миграция, тас дойдулары кытары сыһыан туһунан кэпсэтиэҕэ.

edersaas.ru


Сэбиэт пресс-сэкирэтээтэ Евгений Аношин этэринэн, мунньахха Николай Платонович миграционнай бэлиитикэҕэ туһуламмыт судаарыстыбаннай бырагыраама туолуутун, нэһилиэнньэ ахсаана эбиллиитин, дьон-сэргэ Уһук Илин регионнарга олохсуйа хаалыыларын ырытыыга таһаарыаҕа. Ону сэргэ, тас дойдулары кытары кыраныыссалаһан олорор регионнарга болҕомтону хатыаҕа.
Куттал суох буолуутун сэбиэтин сэкирэтээрэ Уһук Илин регионнарга анаан былырыын Южно-Сахалинскайга мунньах ыыппыта. Онно кини энергетика уонна аһынан-үөлүнэн хааччыллыы боппуруостарын көтөхпүтэ. Ол иһигэр тас дойдуттан кэлэр оборудованиелартан биһиги наһаа тутулуктанарбытын, технология өттүнэн атыттартан хаалан иһэрбит энергетика өттүгэр күчүмэҕэйдэри үөскэтэллэрин, регионнарга гаастааһын бытааннык баран иһэрин бэлиэтээбитэ. Оттон ас-үөл, бородууксуйа боппуруостарыгар сыһыаран, тыа хаһаайыстыбатын оҥорон таһаарыытыгар улахан болҕомто ууруохха наадатын, билигин да этинэн, үүтүнэн, оҕуруот аһынан кыайан хааччыллыбаппытын эппитэ. Ону таһынан балыктааһын эйгэтин сайыннарарга этиилэри киллэрбитэ.

Аграфена КУЗЬМИНА,“Саха сирэ” хаһыат, edersaas.ru 

0
0

Санааҕын суруй