Дьалхааннаах 90-с сыллар ыар тыыннара билигин да биллэн ааһаллар — Мииринэйгэ мөлүйүөн аҥаарын түүрэйдээн былдьыы сатаабыт урдустары туттулар.
СӨ ИДьМ-тын пресс-сулууспата иһитиннэрбитинэн, полиция холуобунай ирдэбилин уонна РФ Куттал суох буолуутун федеральнай сулууспатын Саха сиринээҕи управлениетын (УФСБ) оперативниктара суһал-ирдиир тэрээһиннэр кэмигэр харчы түүрэйдээһиҥҥэ уорбаланааччылары туппуттар.
Бу урут хаста да сууттана сылдьыбыт, Үөһээ Бүлүүттэн уонна Сунтаартан төрүттээх 37, 30 саастаах урдустар эрдэттэн киксибит бөлөҕүнэн Удачнай куорат үс олохтооҕуттан кырбыырынан куттаан туран, 500 тыһ. солк. тахса суумманы түүрэйдээн көрдөөбүттэр.
Уорбаланааччылартан биирдэстэрин гарааһыгар араас калибрдаах 120-тан тахса ботуруону булбуттар.
Урут киһини өлөрөн сууттана сылдьыбыт Үөһээ Бүлүү 37 саастаах киһитин силиэстийэлиир изоляторга хаайбыттар.
Бу чахчынан холуобунай дьыала тэриллэн силиэстийэлэнэр.
Биһиги корр., «Саха сирэ» хаһыат, edersaas.ru
Хаартыска: интэриниэттэн.