Кутаналар «Уол Дуолан бухатыыр» олоҥхону дьиэ кэргэнинэн аахтылар

Ааптар: 
Бөлөххө киир:

 Л. А. Попов аатынан Сунтаар киин библиотеката ыытар «Уол Дуолан бухатыыр» олоҥхону дьиэ кэргэнинэн ааҕыы улуустааҕы  күрэhигэр Т. С. Кириллин аатынан Кутана сельскай модельнай библиотеката 10 ыалы кытыннарда.

Кутанатааҕы «Алгыс» култуура киинин үлэһиттэрэ ааҕааччыларга култуурунай тэрээһинин тэрийсэн, ыытыһан кыттааччылар олус астыннылар. Бу бырайыак Россияҕа «Норуоттар култуурунай нэһилиэстибэлэрин», улууска «Дьиэ кэргэн», Сунтаардааҕы кииннэммит библиотечнай ситимҥэ «Дьиэ кэргэнинэн ааҕыы» сылларын чэрчитинэн ыытыллар.

«Уол Дуолан бухатыыр» олоҥхо ааптара Митрофан Захарович Мартынов-Бөөдөс Кутанаттан төрүттээх олоҥхоһут. Митрофан Мартынов Сунтаар улууһун Хаҥалас нэһилиэгэр 1895 сыллаахха күн сирин көрбүт. Урукку киһи сиэринэн үөрэҕэ суох. Бэйэтэ аҕыйах саҥалаах, бэрт сэмэй киһи. 15 сааһыттан олоҥхолуур буолбут. Митрофан Захарович бэйэтэ билиммитинэн үс олоҥхону («Оҕо Дуолан», «Оҕо Сиэрсин», «Кыыдаан бухатыыр») таптаан толорор эбит. Эдэр эрдэҕинэ алта-сэттэ күн устата олоҥхолуура. Ону таһынан кини булчут бэрдэ. Ыйы ыйдаан Намана, Ботомоойу, Моркуоку, Ыгыатта, Нотуора үрэхтэри батан бултуура. 1938 сыллаахха аатырбыт фольклорист Андрей Андреевич Саввин Сунтаарга кэлэ сылдьан, Митрофан Мартынов «Оҕо Дуолан» олоҥхотун хас да күн устата илиитинэн суруйбут. Олоҥхо 4350 устуруокалаах. Онто 2010 сылга туспа кинигэ буолан тахсыбыта кэрэхсэбиллээх.

Митрофан Мартынов сиэнэ, эмиэ олоҥхоһут Митрофан Николаевич Семенов эһэтин удьуордаан улууска, республикаҕа элбэх ситиһиилээх олоҥхоһут. Олоҥхоһут, тойуксут хос сиэнэ, Сайаана Семенова оскуолаҕа үөрэнэ сылдьан, хос эһэтин олоҥхотун ырытан өрөспүүбүлүкэтээҕи НПК-ларга ситиһиилээхтик кыттыбыта.
Онон Кутана олохтоохторо дьиэ кэргэнинэн биир дойдулаахпыт айымньытын киэҥ тутта, астына, олус көхтөөхтүк аахтылар. Олоҥхону барыта 10 ыал аахта. Биир бэлиэ, кэрэхсэбиллээх түгэнинэн Кутанабыт баһылыга Николай Васильевич Давыдов дьиэ кэргэнинэн ааҕыыга кыттыыны ылбыта буолар.

Т.С.Кириллин аатынан Кутана сельскай модельнай библиотекатын кылаабынай  библиотекара  Нюргуяна Егорова

+1
0
+1
0
+1
0
+1
0
+1
0
+1
0
+1
0