Балаҕан ыйын 13 күнүгэр тапталлаах аҕабыт, эһэбит, фольклорнай-литературнай, историческай-краеведеческай А.А. Иванов-Күндэ музей дьиэтин төрүттээччи, Арассыыйа Суруналыыстарын сойууһун чилиэнэ, Саха Өрөспүүбүлүкэтин үтүөлээх учуутала, Саха Өрөспүүбүлүкэтин үөрэҕириитин туйгуна, Саха Өрөспүүбүлүкэтин култууратын туйгуна, III истиэпэннээх Үлэ Албан аата уордьан кавалера, Сунтаар улууһун Кутана нэһилиэгин бочуоттаах олохтооҕо, краевед, этнограф, тылбаасчыт Трофим Семенович Кириллин-Күндүмэн олоҕун сэһэнэ, чугас дьонун ахтыылара уонна айар үлэтин сүрүн түһүмэхтэриттэн ыстатыйалар, сценарийдар, Кутана нэһилиэгин араас кэмнээх историята, кэрэмэс дьоно үйэтитиллэн 32 видео устуу QR кодтанан киирбит «Күндү киһибит Күндүмэн» диэн кинигэтин Кутанатын дьонугар-сэргэтигэр, чугас дьонугар олус истиҥ-иһирэх кинигэ сүрэхтэниитэ буолла.
Кинигэ сүрэхтэниитин Саха Өрөспүүбүлүкэтин культуратын туйгуна, Саха Өрөспүүбүлүкэтин культуратын үтүөлээх үлэһитэ, кэргэнэ Зоя Григорьевна Кириллина, кыыһа Нюргуяна Трофимовна Егорова, Т.С. Кириллин аатынан Кутана сельскай модельнай библиотекатын сүрүннүүр библиотекара Светлана Валерьевна Егорова иилээн-саҕалаан ыыттылар.
Бу күн Трофим Семёнович 25 сыл устата бар дьонугар анаан көҕүлээн ыыппыт «Дьиктилээх хонуу («Поле чудес»)» оонньуута кэлбит ыалдьыттарга анаан, аҕабыт өрө туппут, үйэтиппит суруйааччыта А.А.Иванов-Күндэ төрөөбүтэ 125 сылыгар ананан, кини айымньыларынан ыытылынна. Оонньуу кыайыылааҕынан Т.С. Кириллин биир идэлээҕэ Зоя Тарасовна Саввинова буолла.
Күндү киһибитин атаастара, доҕотторо, тапталлаах дойдутун дьоно-сэргэтэ истиҥник ахтан-санаан, ытыгылаан ыытар тэрээһиммитигэр ыалдьыт буоллулар!
Түгэнинэн туһанан, кэргэним, аҕабыт, эһэбит кинигэтэ күн сирин көрөрүгэр күүс-көмө, өйөбүл буолбут үөрэнээччитигэр, Кутана нэһилиэгин баһылыгар Николай Васильевич Давыдовка, улуус баһылыгар Анатолий Васильевич Григорьевка муҥура суох махталбытын биллэрэбит.
Бар дьоммутугар Күндү киһибитин Трофим Семенович-Күндүмэни убаастаан-ытыктаан кэлэн, үөрүүбүтүн үллэстибиккитигэр, истиҥ тыллары эппиккитигэр,өйөбүлгүтүгэр улаханнык махтанабыт.
Бары үтүөнү кытта Т.С.Кириллин дьиэ кэргэнэ, Т.С Кириллин аатынан Кутана сельскай-модельнай библиотеката.