Сүрүн куоластыыр күн, от ыйын 1 күнүгэр, элбэх киһи биир кэмҥэ мустубатын наадатыгар, дойдубутугар бу нэдиэлэ устатыгар куоластааһын бара турар.
Ол курдук, Сунтаар улууһун Кутанатааҕы 504 N-дээх куоластыыр учаастага, биир дойдулаахтарын түөлбэлэринэн ыҥыран, куоластата сылдьар. Оттон сайабылыанньалаах дьону, хамыыһыйа чилиэннэрэ, дьиэлэринэн сылдьан куоластаталлар. Киэһээ 8 чааска диэри үлэлииллэр. Бу күннэргэ “Күндэ”, “Үрэх үрдэ”, “Сайдыы” түөлбэлэр куоластаатылар. Кэлэр үс күн устата “Ньургуһун”, “Үрдэл”, “Дьулуур” түөлбэлэр дьонноро бэйэлэрин гражданскай иэстэрин толоруохтара.
От ыйын 1 күнүгэр быыбардыыр учаастак сарсыарда 08.00 чаастан киэһээ 20.00 чааска диэри үлэлиэҕэ.
— Быыбардааччыбыт ахсаана испииһэгинэн уопсайа 631 киһи. Онтон 12-тэ аан бастаан куоластааһыҥҥа кыттар эдэр дьон. Кинилэргэ өйдөбүнньүк бэлэх туттардыбыт. Бүгүҥҥү туругунан, учаастакка кэлэн 121, дьиэтигэр 68 киһи куоластаатылар. Куоластааһын түөлбэлэринэн бара турар. Хамыыһыйа 7 чилиэннээх, 2 волонтёр үлэлиир.
Санитарнай өттүнэн хааччыллыыбыт үчүгэй — анал харыстанар таҥас, экран, бэрчээккэ, мааска, антисептик арааһа, киирэр ааҥҥа коврик… Хантаага суох кыраадыһы мээрэйдииргэ термометр.
Биһиги учаастакпытыгар Тумул диэн сайылык баар, кыһынын онно сүөһү көрөөччүлэр олороллор. Оттон “Роснефть” үлэһиттэрин (суол, муоста оҥорооччулар) баахтабай кыра куораттара 70-ча киһилээх, — диэн иһитиннэрдэ биһиэхэ хамыыһыйа чилиэнэ Айталина Иппатьевна Слободчикова.
“Ыйыллыбыт күҥҥэ кыайан кэлбэт, эрдэ барар-кэлэр буоллаххытына, дьонун көрөн, хаһан баҕарар кэлэн куоластыаххытын сөп…”, — дииллэр хамыыһыйа чилиэннэрэ куоластааччыларга туһаайан.
Хаартыскаҕа: аан бастаан куоластыыр ыччат бу күнү өйдүү-саныы сылдьыаҕа.
Татьяна МАРКОВА.