Саха АССР норуодунай уонна үтүөлээх артыыһа, киэҥник биллэр самодеятельнай композитор, дэгэрэҥ ырыатынан дьон-сэргэ сүрэҕин туппут, эргиччи талаанынан сөхтөрбүт, киэҥ биһирэбили, норуот тапталын ылбыт Христофор Максимов төрөөбүтэ 100 сылыгар анаммыт тэрээһиннэр тиһиктээхтик ыытыллаллар.
Дьокуускайга Саха сирин норуоттарын муусукатын уонна фольклорун мусуойун научнай сотруднига Александр Ноговицын иһитиннэрбитинэн, бэҕэһээ мусуойга «Кустук араас өҥөр дьүөрэлээх айар талаан» диэн Христофор Максимовка аналлаах быыстапка үлэтэ саҕаламмыт. Быыстапкаҕа Христофор Максимов олоҕун, айар үлэтин көрдөрөр, кэпсиир матырыйааллар, ытык киһи доҕор оҥостубут, кыбына сылдьыбыт байаана, ырыанньыктара, кини туһунан кинигэлэр, оччолорго бииргэ алтыспыт доҕотторун хаартыскалара, маллара-саллара дьон-сэргэ көрүүтүгэр-истиитигэр туруоруллубуттар. Бэрт интэриэһинэй быыстапка атырдьах ыйын 31 күнүгэр диэри үлэлиир.
Биһиги корр., «Саха сирэ» хаһыат, edersaas.ru
+1
+1
+1
+1
+1
+1
+1