Коронавирус туһунан сурахтартан аралдьыйа таарыйа сааскы кустааһыны ахтыахха. Саха сирин эр дьоно үксэ кус хаһан кэлэрин, көҥүллүөхтэрин дуу, суоҕун туһунан ырытыһаллар, долгуйаллар.
edersaas.ru
Онон СӨ экологияҕа, айылҕаны туһаныыга уонна ойуур хаһаайыстыбатыгар министиэристибэтин Булт департаменын салайааччытын солбуйааччы Анатолий Семенович Поповтан туоһуластыбыт.
— Сааскы кустааһыны киһи барыта интэриэһиргии олорор. Биллэрин курдук, РФ айылҕа ресурсаларыгар уонна экологияҕа миниистирэ Дмитрий Кобылкин гражданнарга билиҥҥи хааччахтааһын усулуобуйатыгар эрэгийиэннэргэ сааскы бултааһыны арыйбаттарыгар сүбэлээбитэ. Онон сибээстээн, СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэтэ иһитиннэрбитинэн, биир нэдиэлэнэн СӨ Бырабыыталыстыбатын иһинэн Булт уонна булт хаһаайыстыбатын сэбиэтэ ыытыллара күүтүллэр. Сэбиэт мунньаҕа видео-кэмпириэнсийэ эрэсииминэн ыытыллыахтаах. Манна тустаах министиэристибэ департаменнарын сэргэ СӨ Борокуратууратын, Росприроднадзор СӨ управлениета, Роспотребнадзор СӨ управлениета, наука тэрилтэлэрэ уо.д.а. кытталлара күүтүллэр. Ол эрээри сэбиэт мунньахтаан, сүбэлэһэн ылыммыт сүбэтигэр олоҕуран, СӨ Ил Дархана көҥүллүүр эбэтэр бобор туһунан быһаарыы ылыныа, — диэтэ Анатолий Попов.
Онон, күндү булчуттар, ыксаабакка кэтэһиҥ. Хата, онуоха диэри дьаҥмыт хаптайдын.
Женни Стрюкова, “Саха сирэ” хаһыат
Хаартыска: интэриниэттэн.