Бэҕэһээ, от ыйын 22 күнүгэр, сарсыарда 10 чаас саҕана, Хаҥалас улууһугар баар «Курулуур» туристар базаларыгар хомолтолоох быһылаан таҕыста.
Көрбүт дьон кэпсииринэн, уол доҕотторун кытта ууга ыстаммыт. Кинини ууттан туора дьон таһаарбыттар уонна уон мүнүүтэ устата сүрэҕин массаастаан, бастакы көмөнү оҥоро сатаабыттар даҕаны, уол тыына быстаахтаабыт…
Силиэстийэ уорганнара бу 27 саастаах уол ууга былдьаммыт чахчытынан процессуальнай бэрэбиэркэ саҕалаатылар. Туохтан өлбүтүн быһаарар сыалтан судебнай-медицинскай экспертиза анаммыт.
Курулуур кэрэтинэн эрэ буолбакка, тымныы, дохсун, күүстээх сүүрүгүнэн итиэннэ халтараан таастарынан эмиэ аатырар. Онон, ити күрүлгэҥҥэ сөтүөлүүр олох да сатаммат.
Ити күн иккис хомолтолоох быһылаан Тулагы бөһүөлэгэр Өлүөнэ эбэҕэ тахсыбыт. Манна 51 саастаах дьахтар сөтүөлүү сылдьан тимирбитин туһунан иһитиннэрии ис дьыала уорганнарыгар сарсыарда 11 чаас саҕана киирбит.
Силиэстийэ уорганнара бу чахчынан процессуальнай бэрэбиэркэ саҕалаатылар. Туохтан өлбүтүн быһаарар сыалтан судебнай-медицинскай экспертиза анаммыт.
Бу туһунан РФ Силиэстийэлиир кэмитиэтин Саха сиринээҕи управлениета иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн