«Куруһаала» эргиэн киинин тиэргэнигэр — ас-үөл, таҥас-сап быыстапката
Балаҕан ыйын 23-25 күннэригэр Дьокуускайга Кырдьаҕас куоракка «ЯкутияЭкспо-2021» V Эрэгийиэннэр икки ардыларынааҕы универсальнай быыстапка буола турар.
Тэрээһин СӨ предпринимателлэрин пуорумун чэрчитинэн ыытыллар. Быыстапкаҕа Арассыыйа 4 эрэгийиэниттэн 15 атыы-эргиэн хампаанньата кыттыыны ылар.
Коронаирус сыстыганнаах дьаҥынан сибээстээн, быыстапка сибиэһэй салгыҥҥа таһырдьа буола турар.
Дьон ордук Монголияттан кэлбит сылаас таҥастан хото хаһаанна.
Алтай сүөһүтүн тириититтэн оҥоһуллубут атах таҥаһа үгүс киһи болҕомтотун эмиэ тарта.
Усуйаана улууһун минньигэс балыга былдьаһыгынан атыыга барар.
Күндү таас кыырпаҕыттан оҥоһуллубут хартыыналары атылаһааччылар эмиэ бааллар.
Сарсын дьаарбаҥка бүтэһик күнүн үлэлиир. Онон бэртээхэй тэрээһини көтүтүмэҥ.
Елена ПОТОЦКАЯ, “Саха сирэ” хаһыат, edersaas.ru
Хаартыскаҕа ааптар түһэриитэ.