Курбуһахха Николай Окоемов төрөөбүтэ 125 сылыгар аналлаах тэрээһин ыытылынна
Уус Алдан улууһун Курбуһах нэһилиэгэр Саха Автономиятын 100 сылын бэлиэтээһин бэйэтэ туспа дириҥ ис хоһоонноох.
Ол курдук Саха Автономиятын турууласпыт чулуу дьоммут суолларын салҕааччы, уустук кэмҥэ автономия соруктарын олоххо киллэриигэ улахан үлэни ыыппыт Обком II сэкирэтээрэ Николай Николаевич Окоемов төрөөбүтэ 125 сылыгар бырааһынньыктааҕы тэрээһин туһуланна.
Тэрээһин Николай Окоемов пааматынньыгар, кини сырдык аатын кэриэстээн туран, сибэкки дьөрбөтүн уурууттан саҕаланна. Салгыы Николай Окоемов аатынан Курбуһах орто оскуолатыгар мемориальнай дуосканы аһыы үөрүүлээх линейката буолла.
Ити үбүлүөйдээх сыллар тэрээһиннэрин чэрчитинэн быйыл Курбуһах нэһилиэгэр 10 күннээх декада ыытыллан араас хабааннаах тэрээһиннэр буола тураллар. Ол курдук, оскуола уонна уһуйаан оҕолоругар бэсиэдэлэр, кылаас чаастара, уруһуй күрэхтэрэ, улуустааҕы «Окоемовскай ааҕыылар», «Дойдум миэнэ — Уус Алдан!» диэн тэрилтэлэр икки ардыларыгар бэстибээл уо.д.а. ыытыллынна.
Өрөспүүбүлүкэ өрөгөйдөөх күнэ бэстибээл түмүгүн таһаарыы дьоро киэһэ улахан кэнсиэринэн түмүктэннэ.
Улуус дьаһалтатын пресс-сулууспата.