Уус Алдантан Курбуһах бибилэтиэкэрэ Марфа Пестрякова нэһилиэктэртэн доруобуйаларынан хааччахтаах дьон түмсүүлэрэ мустан саҥа үүммүт сылларын үөрэ-көтө бэлиэтээбиттэрин кэпсиир.
Тэрээһиҥҥэ Сыырдаахтан, Бэйдиҥэттэн, Тандаттан, Курбуһахтан түмсүүлэргэ сылдьааччылар, кырдьаҕастар уонна инбэлииттэр дьиэлэрин олохтоохторо мустубуттар.
—Бырааһынньыгы нэһилиэк уус-уран самодеятельноһын көхтөөх кыттааччылара уонна “Сандал” СК кэлэктиибэ ситэрэн-хоторон, киэргэтэн биэрдилэр. Саҥа дьыл туһунан бэртээхэй музыкальнай туруорууну көрдөрбүттэрин ыалдьыттар олус сэргээтилэр, астына көрдүлэр. Саҥа дьыл кэрэһитэ – Ыт оҥоһугар уонна маскараакка бэртээхэй куонкурус ыытылынна. Түмүккэ кыайыылаахтар бэлэхтэри тутан үөрдүлэр. Балаҕаҥҥа итии чэйдээх, толору астаах сандалы тула олорон истиҥ кэпсэтии таҕыста. Манна сыл устатыгар ыытыллыбыт тэрээһиннэрин сырдаттылар, үлэ үөрүйэҕин атастастылар. Аһаҕас микрофон, араас көрдөөх оонньуулар, үҥкүү-битии көҕүлүттэн тутулунна. Дьоро күҥҥэ мустубуттар бука бары дьиэлэригэр өттүк харалаах, илии тутуурдаах тарҕастылар, — диэн кэпсээтэ Марфа Анатольевна.
Бу күн нэһилиэк баһылыгын солбуйааччы А.И.Аммосова, «Саһарҕа» инбэлииттэр түмсүүлэрин салайар Е.М.Григорьева истиҥ эҕэрдэлэрин тиэрдэн туран, ытыс тыаһыгар доҕуһуоллатан өйдөбүнньүк бэлэхтэри туттарбыттара түмсүүлэр санааларын улаханнык бөҕөхсүппүт. «Саҥа сылга үлэбитин өссө кэҥэтиэхпит, сайыннарыахпыт”, — дэспиттэр бырааһынньык түһүлгэтин ыалдьыттара.
Сардаана БАСНАЕВА, “Саха сирэ” хаһыат, edersaas.ru