edersaas.ru
Уопсастыбаннай түмсүү нэдиэлэҕэ иккитэ-үстэ киин куорат кырдьаҕастарын уонна инбэлииттэрин интэринээттэригэр, пансионаттарга, чугастааҕы улуустарга кырдьаҕастар дьиэлэригэр кэнсиэрдээн, ыллаан-туойан, үҥкүүлээн кэлэллэр.
«Иэйии» түмсүүнү тэрийээччилэртэн биирдэстэрэ, актыбыыс бэрдэ, суорумньуһут, Өймөкөөн улууһун «Хотугу сардаҥа» хаһыат уопсастыбаннай кэрэспэдьиэнэ, улуустааҕы кинофикация бэтэрээнэ, «Өймөкөөн» кэммиэрчэскэйэ суох тэрилтэ чилиэнэ Валентина Прокопьева Курбуһахтааҕы инбэлииттэр уонна кырдьаҕастарын дьиэлэрин туһунан бу курдук кэпсиир:
— Интэринээт өрөспүүбүлүкэҕэ бастыҥ аатын ылыан ылар эбит. Тэрилтэ бэйэтэ кэтэх хаһаайыстыбалаах — сылгыта диэн, сибиинньэтэ диэн, кууруссата диэн. Оҕуруот аһа дэлэйэ, күн бүгүҥҥэ диэри бэйэлэрин оҕуруоттарын аһын сии олороллор. Салайааччы Василий Аммосов бэлиэтииринэн, интэринээккэ 70 сааһыттан 96 сааһыгар диэри 50 кырдьаҕас олорор.
Сайын сынньанар саха балаҕанын туттубуттар. Онно араас тэрээһиннэр буолаллар эбит. Барыта ититии ситимигэр холбоммут. Балаҕаны эр дьон субуотунньуктаан туппуттар. Тэрилтэ 40 үлэһиттээх.
Холбоһон олорор ыалга туспа хос бэлэхтээбиттэр. Хас аан аайы ким кимниин олороро — барыта маннык хаартыскалаах.
