Өлүөхүмэ улууһун «Поиск» кэпэрэтиибэ быйыл ыһыытын ыам ыйын 22 күнүттэн саҕалаата.
edersaas.ru
Мэхэньисээтэрдэр уон биир киһилээх, алта тиэхиньикэлээх биригээдэлэрэ бу күннэргэ Курандаҕа баар Кутурук бааһынатыгар үлэлии-хамсыы сылдьар. Быйыл саҥа ылбыт «Агратор» диэн ыһыы туһаныллар комплекстарын «айааһыыллар».
Бу комплекс элбэх үлэни биирдэ толорор: бааһына сирин таҥастыыр, тарыыр, минеральнай уоҕурдууну киллэрэр уонна сиэмэни түһэрэр, өссө хотуоктуур. Маннык көлөлөөх буоланнар, сир уустара ыһыыны урукку сыллардааҕар эрдэ бүтэрэргэ суоттаналлар.
— Бурдугу 300 гектар ыһыахпыт, – диир хаһаайыстыба салайааччыта Алексей Самсонов. – Ити иһигэр, 75 гектарга сэлиэһинэйи, 50 гектарга эбиэһи, 175 гектарга ньэчимиэни ыһабыт. Барыта этэҥҥэ буоллаҕына, аны күһүн 450 туонна бурдугу, эбэтэр гектартан ортотунан 15 ц хомуйарга былаанныыбыт. Кэлэктииппит эдэр, уолаттар бары да үлэҕэ-хамнаска үөрүйэх дьон. «Беларусь» тыраахтардарга Поликарп уонна Евгений Федуловтар, Валерий Садилов, «Т-150» тыраахтарга Борис Седалищев, Антон Бояркин үлэлииллэр. Оттон саҥа «Агратор» Александр Силантьевка туттарылынна. Күн-дьыл туран эрэ биэрдэр, сир сиигин баттаһан, ыһыыбытын сөпкө бүтэриэхпит.
«Саха сирэ» хаһыакка, edersaas.ru саайтка анаан
Өлүөхүмэттэн Валерий Малышев.
Хаартыскалар — ааптар тиксэриитэ.