«Кураанынан сибээстээн эрэгийиэн суолталаах ыксаллаах быһыы-майгы эрэсиимин киллэрэр туһунан» Ил Дархан ыйааҕа

Бөлөххө киир:

Бэс ыйыгар уонна от ыйын маҥнайгы дэкээдэтигэр сөҥүү түспэккэ курааннаан, халлаан куйааран, Саха Өрөспүүлүкэтин Конституциятын (Төрүт сокуонун) 72-с ыстатыйатын 13-с пуунугар, 1994 сыл ахсынньы 21 күнүгэр тахсыбыт «Айылҕа үөскэтэр итиэннэ техногеннай майгылаах ыксаллаах быһыытыттан-майгыттан нэһилиэнньэни уонна территориялары араҥаччылыыр туһунан» 68 нүөмэрдээх федеральнай сокуоҥҥа, 2005 сыл бэс ыйын 16 күнүгэр тахсыбыт «Айылҕа үөскэтэр итиэннэ техногеннай майгылаах ыксаллаах быһыытыттан-майгыттан өрөспүүбүлүкэ нэһилиэнньэтин уонна территорияларын араҥаччылыыр туһунан» Саха Өрөспүүбүлүкэтин 252 №-дээх сокуонугар, Арассыыйа Федерациятын Бырабыыталыстыбата 2007 сыл ыам ыйын 21 күнүгэр таһаарбыт «Айылҕа үөскэтэр итиэннэ техногеннай майгылаах ыксаллаах быһыыны-майгыны классификациялыыр туһунан» уурааҕар олоҕуран, ыксаллаах быһыы-майгы таһаарар хоромньутун аччатар туһуттан уураахтыыбын:

1. Кураанынан сибээстээн от үүммэтэҕинэн, 2021 сыл от ыйын 29 күнүттэн Мэҥэ Хаҥалас, Ньурба, Сунтаар, Нам, Уус Алдан, Хаҥалас, Томпо, Өлүөхүмэ, Өймөкөөн, Чурапчы улуустарыгар уонна «Дьокуускай куорат» куораттааҕы уокурукка эрэгийиэн суолталаах ыксаллаах быһыы-майгы эрэсиимин киллэрэргэ.

2. Бу быһаарыы туһунан Саха Өрөспүүбүлүкэтин Судаарыстыбаннай Мунньаҕар (Ил Түмэҥҥэ) биллэрэргэ.

3. Саха Өрөспүүбүлүкэтин Бырабыыталыстыбата (Тарасенко А.В.) тыа хаһаайыстыбатын табаарын оҥорооччулар көрсөр материальнай хоромньуларын аччатар дьаһаллары ыларыгар.

4. Ыксаллаах быһыыны-майгыны сэрэтэр уонна туоратар биир кэлим судаарыстыбаннай систиэмэ Саха сиринээҕи территориальнай салалта уорганнарыгар уонна күүстэригэр «Ыксаллаах быһыы-майгы» эрэсиимин киллэрэргэ.

5. Мэҥэ Хаҥалас, Ньурба, Сунтаар, Нам, Уус Алдан, Хаҥалас, Томпо, Өлүөхүмэ, Өймөкөөн, Чурапчы улуустарыгар уонна «Дьокуускай куорат» куораттааҕы уокурук дьаһалталарын баһылыктарыгар сүбэлииргэ:

1). Кураан содулун чэпчэтиигэ сөптөөх дьаһаллары ылалларыгар;

2). Хамыыһыйалары тэрийэн, ходуһа уонна мэччирэҥ сирдэри чинчийэн, тустаах докумуоннары Тыа хаһаайыстыбатын министиэристибэтигэр түһэрэллэригэр;

6. Ыйаах толоруллуутун хонтуруоллааһыны бэйэбэр ылынабын.

7. Бу ыйааҕы официальнай маассабай иһитиннэрэр сириэстибэлэргэ таһаарарга.

Саха Өрөспүүбүлүкэтин Ил Дархана Айсен НИКОЛАЕВ

2021 сыл, от ыйын 29 күнэ.

1996 №