Таатта улууһугар дьоһун Дьохсоҕон нэһилиэгэр айар кут алыбар ылларбыт «Куорсун» литературнай түмсүү биэс сыллаах үбүлүөйүн куйаар ситиминэн бэлиэтээтэ.
Бу үөрүүлээх тэрээһиҥҥэ икки саҥа кинигэ биһирэмэ буолла. Валентина Пинигина-Арылы айар аартыгын кылгастык билиһиннэрдэ, салгыы Альбина Тарбахова-Таатта кыыһа хоһооннорун тиэмэлэринэн наардаан тоҕус альбом оҥорбутун көрдөрдө, кэпсээтэ. Альбомнарыгар хас биирдии хоһооно бүтүннүү хаартысканан, ойуунан киэргэтиллибиттэрэ көрүөххэ олус үчүгэй, болҕомтону тардар. «Куорсун» литературнай түмсүү биир көхтөөх кыттааччыта Акулина Егасова-Дьохсоҕон кыыһа саҥа кэм олоҥхоһутунан биллэр. Кини тэттик кэпсээннэрин түмэн «Ийэкээм, ытаама дуу, күүтээр» диэн кинигэ оҥорон таһаарбыта кэрэхсэбили ылла. Бу Саха Өрөспүүбүлүкэтигэр Ийэ сылыгар бэртээхэй бэлэх буолла.
Айар куттаахтар куйаар ситиминэн тэрээһиҥҥэ кыттыһан, «куорсуннарга» истиҥ тылларын анаатылар. «Айар Кут» хоһоонньуттар, суруйааччылар холбоһуктарыттан Валерий Никифоров — Суор Уола, Анна Григорьева, Зоя Данилова — Кэкэрдэ, Аскалон Егоров — Өркөн Дьол эҕэрдэлээтилэр. Өркөн Дьол бэйэтин ырыатын бэлэхтээн дьону-сэргэни үөртэ.
Арылы «Көҥүл көтөр санааларым», Дьохсоҕон кыыһа «Ийэкээм, ытаама дуу, күүтээр» саҥа кинигэлэрин ырытыыга ааҕааччылар санааларын үллэһиннилэр. Нэһилиэк аҕа баһылыга П.Е.Захаров хас биирдиилэрин ааттаан-суоллаан эҕэрдэлээбитэ, бары үтүөнү баҕарбыта сүргэни көтөхтө. Салгыы бэтэрээннэр сэбиэттэрин бэрэссэдээтэлэ М.Л.Архипов, нэһилиэккэ бастакы, соҕотох ааҕар түмэл хаһаайката Г.Е.Арылахова, олохтоох оскуола дириэктэрэ В.Д.Петрова, «Победа» ХЭТ салайааччыта М.И.Саввин, улуустааҕы кииннэммит бибилэтиэкэттэн С.И.Игнатьева, С.В.Ефремова, «Уран тыл» литературнай түмсүүттэн С.П.Андросова, Алампа аатынан норуот айымньытын дьиэтин дириэктэрэ И.С.Жараева эҕэрдэлэрин тиэртилэр. Түмүккэ, «куорсуннарга» кинигэлэр, өйдөбүнньүк бэлэхтэр туттарылыннылар. Дьоро күн кыттыылаахтарыгар барыларыгар барҕа махтал.
Галина Другина,
нэһилиэк бибилэтиэкэтин сэбиэдиссэйэ,
«Куорсун» түмсүү салайааччыта
Дьохсоҕон, Таатта.
Хаартыскалар Г.Другина тиксэриилэрэ