Бэҕэһээ Күөх Хонууга эмискэ уу киирэн, биирдэ килэс гына түспүтэ. Уу эбиллэ турар буолан, салгын сии, дьаарбайа таарыйа, киэһэлик 8 чаас диэки 203-с микрооройуон муннугунан өрүскэ киирэ сырыттым.
Дьэ, доҕоор, ыраахтан көрдөххө, массыына субуллан олорор, букатын ыһыах киһитэ мустубут. Сүүһүнэн массыына кэчигирэспит, турар да миэстэлэрэ суох. Харантыын эрэ, туох эрэ. Оҕолуун-уруулуун, эдэрдиин-эмэнниин мустубуттар. Сорохтор мааскалара да суох.
Бу иннинэ үөһэттэн түһэриллибит хаартыска батсаабы тилийэ көппүт буолан, көрүөх баҕалаах элбэх эбит. Ол да буоллар, интэриниэккэ “203 микрооройуон хаһан тимирэр?” диэн кэтэһээччи элбэх үһү. Оннук түгэҥҥэ иэдээн буолуо, тыһыынчанан киһи эмсэҕэлиэ диэн оройдоппот эбиттэр.
Кырдьык, уу бөҕө кэлбит эбит. Уу ресурсаларын федеральнай агентствотын Өлүөнэ сүнньүнээҕи ууга управлениета иһитиннэрбитинэн, бүгүн Дьокуускай аннынан уу чааска 2-5 сантиметр эбиллэ турар. Күнүс 2 чааска Дьокускай аннынан 850 см, Табаҕа аннынан 980 см тиийбитэ. Кангаласс тоҕойун диэки эбиэт кэннэ 1 туонналаах буомбанан иккитэ дэлби тэптэрии оҥорбуттар эрээри, харыы ааспатах. Онон куоракка ыксаллаах балаһыанньа биллэриллибит.
Бүгүн, ыам ыйын 13 күнүгэр Ил Дархан Айсен Николаев бөртөлүөтүнэн көтөн, өрүһү үөһэттэн көрөн кэллэ. Кини: “Балаһыанньа киритиичэскэй буолбатах, дэлби тэптэрии кэнниттэн, этэҥҥэ буолуоҕа” диэн эппитэ уоскутар.
Чахчыта, бу иннинээҕи сылларга эмиэ уу маннык ыга анньан кэлбит түгэннэрдээҕэ.
“Парустар” диэн ааттаммыт дьиэлэр аттыларынан, уу биэрэк үрдүгэр тиийэрэ 1 миэтэрэ кэриҥэ хаалбыт диэн көрдүм. Ол эрээри, биэрэктэн сыыйа үрдээн, суол диэки 2 миэтэрэ кэриҥэ уу таһымыттан үрдээн көстөр.
Бу түүн быһаарыылаах буолара күүтүллэр. Харыы тоҕо баран, эбэбит этэҥҥэ айаннаатын диэн Айыылартан көрдөһөр эрэ буоллахпыт.
Ангелина Васильева, «Саха сирэ» хаһыат, edersaas.ru
Ааптар хаартыскаҕа түһэриилэрэ.
Мантан аллараа «батсаап» хаартыскалара:
