Ыам ыйын 11 күнүгэр 2 чаастаах дааннайынан, уубут таһыма 11 м. 04 см. буолла. Дэлби тэптэрии үлэлэрин түмүгэр хамсаабакка турбут муус дьэ хоҥнон Соморсун аннынан уһунна.
edersaas.ru, Наталья Бубякина
Улуус баһылыгын бастакы солбуйааччы Иннокентий Климентов этэринэн, Мээндиги уонна Соморсун аннынан муус хойуутук устар. Абаҕаҕа муус турар эрээри, уу биир таһымҥа турар. Ууга барбыт уонна суол-иис алдьанан тырааныспар кыайан тиийбэт нэһилиэктиригэр Амма Наахараҕа, Болугурга уонна Покровкаҕа килиэп, бородуукта тиэрдиллэ турар. Билиҥҥи туругунан 300 ыал олбуора, 196 ыал дьиэтэ ууга барда. ЫБММ биллэриллибитинэн иһэр ууга улахан болҕомто ууруллар. Ол курдук Роспотребнадзор биллэрэринэн Булун уонна Кириэстээх үрэҕин уулара киһи иһэригэр сөптөөхтөр. Маны сэргэ, улуустааҕы доруобуйа харыстабылын салаатынан врачебнай-сестринскэй биригээдэлэр тэриллэн ууга барбыт ыалларга дизентерияны, туляремияны, А гепатиты утары вакцинация оҥороллор. СӨ доруобуйатын харыстабылын министиэристибэтэ ыам ыйын 10 күнүгэр эбии вакциналары ыытта.
Бүтүннүү ууга барбыт Промкомбинат олохтоохторо урукку өттүгэр маннык улахан уу кэлбитин өйдөөбөттөр. Уу олус түргэнник кэлбитин, кыра соҕус буолуо дии санаабыттарын, билигин кинилэргэ бородууктанан көмө оҥоһулларын кэпсээтилэр. Түргэнник уу түһэ охсон дьиэлэригэр төннөллөрүн күүтэллэр. Көмө оҥоһуутугар олбуор иһигэр турар тутуулар киирбэт эбит диэн хомойоллор. Холобура гараж, баанньык, сарай, ол иһигэр турбут бары маллар бүүс бүтүннүү ууга барбыттар.
Билиҥҥи туругунан куораттыыр суол Аммаҕа киириитэ уу түһэн массыыналар сылдьалларыгар аһылынна.
Наталья Бубякина, Амма, edersaas.ru сайтка анаан