Бэлиитикэ Сүрүн Уопсастыба Үөрэх уонна наука

Куорат үөрэҕин управлениета сухой паек туһунан быһаарда

Дьокуускай куорат оскуолаларын үөрэнээччилэрин коронавирус дьаҥынан сибээстээн барыларын тэйиччиттэн үөрэххэ көһөрбүттэрэ. Кинилэргэ сухой паек көрүллэр дуо? Үөрэх управлениета маннык быһаарыы биэрдэ.

edersaas.ru

2020 сылга дойду үрдүнэн үрдүк бэлэмнээх буолуу кэмигэр, коронавирус дьаҥа тарҕаныытын сэрэтэр инниттэн нэһилиэнньэни өйүүр туһугар СӨ Үөрэҕин уонна билимин министиэристибэтин 2020 сыл кулун тутар 25 күнүнээҕи “Үөрэх тэрилтэлэрин үөрэнээччилэрин аһылыгынан хааччыйыы туһунан” бирикээһигэр олоҕуран, үстэн элбэх оҕолоох ыал оҕолоругар, төрөппүттэрэ инбэлиит оҕолорго, инбэлиит-оҕолорго, сулууспалаах эбээһинэстэрин толорууга өлбүт  төрөппүттэрдээх оҕолорго, тулаайах уонна төрөппүт көрүүтэ суох хаалбыт оҕолорго, тиийиммэт дьиэ кэргэн оҕолоругар тэйиччиттэн үөрэх кэмигэр сухуой паегу биэртэлээбиттэрэ. “Дьокуускай куорат” куораттааҕы уокурук бүддьүөтэ көрбүт сууматыгар олоҕуран биир оҕоҕо күҥҥэ 54 солк. аһыыр диэн суоттаммытыттан аттарыллыбыт.

“Балаһыанньанан сухой паегу көрүллүбэт, үрдүк бэлэмнээх буолуу кэмигэр нэһилиэнньэни өйүүр сыалтан сухой паегу биэрэргэ быһаарыы ылыныллыбыта.

2012 сыл ахсынньы 29 күнүнээҕи 273 нүөмэрдээх “РФ үөрэх туһунан” сокуонун 37-с ыстатыйатыгар, РФ Бырабыыталыстыбатын 2020 сыл бэс ыйын 20 күнүнээҕи 900 нүөмэрдээх уурааҕар олоҕуран, федеральнай хааһынаттан уонна “Дьокуускай куорат” куораттааҕы уокурук утары үбүлээһинин суотугар алын кылаас үөрэнээччилэрин босхо итии аһылыгынан хааччыйыы тэриллибитэ. Федеральнай сокуон алын кылаас үөрэнээччилэрин сухой паегунан хааччыйыыны көрбөт”, — диэн управлениеҕа быһаардылар.

Быйыл, 2022 сылга тустаах сокуоҥҥа олоҕуран,  дьиэҕэ үөрэнэр доруобуйаларынан хааччахтаах уонна инбэлиит оҕолортон ураты (2012 сыл ахсынньы 29 күнүнээҕи “РФ үөрэх туһунан” 273-с федеральнай сокуон, 79-с ыстатыйатын 7-с чааһа, РФ Үөрэҕин министиэристибэтин 2017 сыл алтынньы 19 күнүнээҕи “Доруобуйаларынан хааччахтаах үөрэнээччилэргэ толору судаарыстыбаннай хааччыйыыны көрүү туһунан” суруга), тэйиччиттэн үөрэнэр, чэпчэтиинэн туһанар араҥаҕа киирсэр алын кылаас, 5-11-с кылаас үөрэнээччилэригэр сухой паек көрүллүбэт диэн иһитиннэрдилэр. Ол эбэтэр, судургутук быһаардахха, Дьокуускай куоракка сухой паек дьиэлэриттэн үөрэнэр доруобуйаларынан хааччахтаах уонна инбэлиит оҕолорго эрэ бэриллэр.

 

Людмила ПОПОВА, “Саха сирэ” хаһыат, edersaas.ru

Хаартыска: penzainform.ru

1
0
Telegram Whatsapp