«СахаАгроПродукт» кэпэрэтиип бырабылыанньатын бэрэссэдээтэлэ Константин Тимофеев быйыл кыстыкка киириигэ айылҕа кыһарҕаныгар түбэспит Абый улууһугар эт соҕотуопкатын боппуруоһугар баран кэллэ. Улуус киинигэр, Үрүҥ Хайаҕа, эбиэс уонна уотурба тиэйэн илдьибит «СирАЭРО» компания Ан-26 сөмөлүөтүнэн 4 туоннаттан тахса киилэ сылгы, убаһа этин Дьокуускайга аҕалла.
Константин Егорович этэринэн, суоллара суох буолан, ыраах нэһилиэктэртэн эттэрин кыайан аҕалбакка олороллор, чугастааҕы Абый нэһилиэгиттэн даҕаны «Буран» көлөнөн эрэ таһаллар эбит. «Сөмөлүөтүнэн 10-ча туоннатын аҕалан баран, онтон ордубутун от тиэйэн илдьэр массыыналарынан аны кыһын суол турдаҕына тиэйиэхпит. Билиҥҥитэ төһө эт буолуоҕа чуолкай биллибэт, хайдах хомуйалларыттан, туттаралларыттан тутулуктаах», – диир өрөспүүбүлүкэ таһымнаах кэпэрэтиип салайааччыта.
Бырабыыталыстыба соҕотуопкалааччыларга тиэрдибит дьаһалынан «СахаАгроПродукт» ӨТХПХБК убаһа этин 320-350 солк., улахан сылгы этин 210-250 солк. харчыга атыылаһар. Абыйдар бу бастакы сырыыга үксэ улахан сылгы этин туттарбыттар. Онтулара сүрүннээн II категорияҕа барбыт. Хата, сыалаах эти сирэр куорат дьахталларыгар дьүөрэлээх ас буолсу.
Манна сыһыаран эттэххэ, тыа хаһаайыстыбалаах улахан улуустар соҕотуопкалыыр, астыыр тэрилтэлэрин түмэр кэпэрэтиип Дьокуускай куоракка сэтинньи 28 күнүттэн Эргэ саҥа дьылга, тохсунньу 13 күнүгэр, диэри «Кыһыҥҥы хаһаас» диэн акцияны биллэрдэ. Дьааһык арыыны атыыласпыт киһиэхэ купон туттаран иһиэхтэрэ. Купоннар нүөмэрдэринэн тохсунньу 16 күнүгэр «Виктория» миэбэл солуонун 100 тыһ. солк. суумалаах сертификатын оонньотуохтара. Дьааһык арыы 8360 солкуобайга атыыланар, ол эбэтэр киилэ арыы 418 солкуобайга турар.
Василий НИКИФОРОВ.