Хаарынан оҥоһуллубут кэлэр 2021 сыл бэлиэтин, Дьыл Оҕуһун, «Центральнай» киинэ тыйаатырын таһыгар туруордулар.
edersaas.ru
Быйыл хаар скульптура иккис сылын туруоруллар. Былырыын эмиэ манна хаар оҥоһук турбутун үгүс киһи сэргии көрбүтэ. Бу туһунан хаар оҥоһук ааптара Анатолий Владимиров-Богослов бу курдук кэпсиир:
— 2021 сыл бэлиэтэ — Оҕус. Онон хайаан да хаар оҥоһук оҥоһулуннаҕына табыллар диэн санаалаах туруордубут. Идиэйэтэ — миэнэ. Мэҥэ Хаҥалас Наахаратын олохтооҕо, бааһынай хаһаайыстыба салайааччыта Ефим Федотовы кытта кэпсэтэн оҥоттордум. Кэлэр сыл бэлиэтин Хатаска оҥорон баран, онтон тиэйэн аҕаллыбыт.
Дьиҥэр, Ленин эбэтэр Орджоникидзе болуоссаттарыгар турар кылаабынай харыйалар иннилэригэр Тымныы Оҕуһун — Саха сирин Тымныытын символын быһыытынан туруортарыахпын баҕарбытым да, кыаллыбата. Онон быйыл эмиэ Дьыл Оҕуһа былырыыҥҥы миэстэтигэр турда.
Хаар оҥоһук ааптара бэлиэтииринэн, сарсын скульптураҕа суруга-бичигэ, уота- киэһэ ситэриллэн биэриэҕэ.
Елена ПОТОЦКАЯ, «Cаха сирэ» хаһыат, edersaas.ru