Дьокуускай куорат 390 сылын бэлиэтиир. Икки күн устата хас да болуоссатынан тарҕанан элбэх тэрээһиннэр буолуохтара. Субуотаҕа күөх халлааҥҥа күн чаҕылыйан, бэртээхэй күн үүннэ.
Үгүс дьон, ордук ыччат өттө, куорат үбүлүөйдээх күнүгэр ханнык “сулус” кэлэрин кэтэһэллэр. Соторутааҕыта Бэрдьигэстээх төрөөбүт күнүгэр 90-с сыллар «сулустара» ырыаһыт Света кэлэн барбыта.
Бу иннинэ DJ Smash кэлэр диэн иһитиннэрбиттэрэ. Ол эрээри, аҕыйах күн иннинэ, кэлбэт буолбут диэн сурах тарҕаммыта. Ди-джей олус ыарахан “техническэй райдерын” (ирдэбиллэрин) кыайан толорботохтор.
Кини оннугар Арассыыйаҕа биллэр рэпер, Дьокуускайтан төрүттээх Леван Горозия, эбэтэр, норуокка биллэринэн, L’One кэлэн ыллыаҕа. Кини “Якутяночка моя” ырыаны саҥалыы тыыннаан ыллаабыта. Хаста да Дьокуускайга кэлэн кэнсиэртээн турар. Леван тапталлаах куоратын төрөөбүт күнүгэр саҥа ырыаны айбыт дииллэр. Дьэ, көрүөхпүт, саҥа ырыата “Якутяночка моя” курдук хит буолар эбит дуу?
L’One кэнсиэрэ балаҕан ыйын 11 күнүгэр киэһэ Кыайыы болуоссатыгар буолуоҕа. Бу кэнниттэн улахан фейерверк буолара күүтүллэр.
Ыспыраапка:
Леван Горозия 1985 сыллаахха Красноярскайга төрөөбүтэ. Аҕата грузин, ийэтэ нуучча, кинилэр устудьуоннуу сылдьан билсибиттэрэ. Уоллара 4 саастааҕар Саха сиригэр Дэлгэй диэн бөһүөлэккэ көһөн кэлбиттэрэ. Сэрии буолуон иннинэ Абхазияҕа дьиэлээхтэр этэ. Леван алын сүһүөх кылааһы бүтэрбитин кэнниттэн, Горозиялар Дьокуускайга көһөн кэлбиттэрэ. Оскуолаҕа үөрэнэр кэмигэр баскетболунан дьарыктаммыта, Саха сирин хомуур хамаандатын хапытаана этэ. Тобугун эчэтэн, успуортан барарга күһэллибитэ. Онон хип-хоп истиилинэн үлүһүйбүтэ. КВН-ҥа оонньообута, араадьыйаҕа ыытааччы быһыытынан үлэлээбитэ, бэл тэлэбиидэнньэҕэ биэриини ыытара. 2005 сыллаахха Москваҕа көһөн, рэпер быһыытынан биллэн барбыта.
Ангелина Васильева, “Саха сирэ” хаһыат, edersaas.ru
Хаартыска: СИА.