Дьокуускай куорат 390 сыллаах бырааһынньыга хас да болуоссатынан, паарканан, Эргэ куоратынан тарҕанан, сарсыардаттан киэһээҥҥэ диэри араас тэрээһиннэринэн дьон болҕомтотун тарта.
Кыайыы болуоссатыгар сүрүн тэрээһиннэри таһынан, уокуруктар, тэрилтэлэр бэйэлэрэ туспа араас аахсыйалары, маастар-кылаастары эмиэ ыыттылар.
Главпочтамт үлэһиттэрэ куорат олохтоохторугар бэртээхэй бэлэҕи оҥордулар — Дьокуускай туһунан открыткалары босхо түҥэттилэр. Мааркалаах открытканы сонно тута суруйан баран, дьааһыкка уган, чугас дьоҥҥо ыытыахха сөп.
Үгүс тэрилтэлэр киһи саҕа уҥуохтаах улахан куукулалары аҕалбыттар. Оҕолору кытары хаартыскаҕа түһэн, күннээтилэр. “АЭБ” баан роботун оҕолор олус интэриэһиргээтилэр. Робот киһи саҕа уҥуохтаах, саҥарар, сирэйин омооно баар, чыпчылыйар, мичээрдиир, дорооболоһор, далбаатыыр.
«Көмүлүөк» хампаанньа туойунан оҥоһуктарга маастар-кылаастары ыытта. Баҕалаах элбэх буолла. Бэйэлэрин устуудьуйаларыгар 1500 солкуобайга маастар-кылаас ыытар буоллахтарына, бүгүн 500 солкуобайга дьону үөрэттилэр. Дьон саҥа үөрүйэххэ үөрэнэн, илиилэринэн оҥорон, оҥоһуктарын илдьэ астынан дьиэлээтилэр.
“Вкусноград” уулусса аһын бэстибээлигэр отучча кафе, урбаанньыт кытынна. Ол эрээри, ас арааһа аҕыйах диэн бэлиэтиэххэ наада. Үксэ 350 солкуобайдаах шашлык уонна бэрэски, бурдук ас. Олорон аһыыр остуол, устуул кэмчи. Уулусса аһа буоллаҕына, тутан илдьэ барарга табыгастаах гына бэлэмнэммит буолуохтаах. Арай, Николай Атласов айбыт “Далбары” диэн бүлүүдэтин кыра соҕус лэппиэскэҕэ суулаан, анаан оҥорбут, 280 солкуобайга атыыланар. Итии чэйи 50 солкуобайга кутан биэрэллэр. Күһүҥҥү тыалтан дьагдайбыт дьон хас туонна чэйи испиттэрэ буолла?
Мантан киэһэ Кыайыы болуоссатыгар бырааһынньыгы түмүктүүр Саина, L`One кэнсиэртэрэ, 10 чаастан улахан фейерверк буолар.
Ангелина Васильева, “Саха сирэ” хаһыат, edersaas.ru
Хаартыска: ааптар түһэриилэрэ.