Куорат икки олохтооҕо түөкүттэргэ албыннатта

Ааптар: 
Бөлөххө киир:

Куорат икки олохтооҕо икки мөлүйүөнтэн тахса солкуобайдарыттан мэлийдилэр.

Ыраахтан олорон дьону-сэргэни албынныыр түөкүттэр араас албастарыгар итэҕэйэн киирэн биэрэр дьон бааллар диэн ИДьМ официальнай саайтыгар иһитиннэрэр.

Түөкүттэр кэпсэтэллэригэр киһини итэҕэтэ сатыыллар, юридическэй терминнэри тутталлар, эппиэтинэстээх буолар туһунан санаталлар.
Ити курдук Дьокуускай куорат биир оскуолатыгар үлэлиир 58 саастаах учууталы албыннаабыттар. Сарсыарда төлөпүөннээннэр үһүс сирэй дэбиэринэһинэн кини аатыгар кирэдьиит ыла сатаабытын туһунан иһитиннэрбиттэр. Итини тохтото охсорго, кини тус бэйэтигэр «утары» кирэдьиит ыларыгар уонна ону «безопасный резервный счет» диэҥҥэ көһөрөрүгэр эппиттэр. Салгыы кинини кытары Центробанк үлэһитэ «Виктория Абрамова» сэһэргэспит. Бу «Виктория Абрамова» түөкүттэр кирэдьиити ылыахтарын иннинэ суһаллык кирэдьиит ыла охсоругар «сүбэлээбит» уонна 1,5 мөлүйүөҥҥэ диэри ылар кыахтааҕын эппит.
Полицияҕа тыллааччы «ХоумКредитБааҥҥа» тиийэн 854 000 солк. ылбыт уонна банкоматынан 15-тии тыһыынчалыы солкуобайынан баан сымыйа үлэһитэ этэр нүөмэригэр ыыппыт. Сарсыныгар ол «Виктория» ыйыытынан, «АТБ» бааҥҥа тиийэн 500 000 солк. кирэдьиит ылбыт уонна эмиэ «куттала суох счекка» ыыппыт. Киэһээ кирэдьиит төлөммүтүн туһунан «докумуону» туппут. Ити курдук түөкүттэр албыннаан 1 350 000  солк. сууманы ылан баран, сибээскэ тахсалларын тохтоппуттар.
Иккис түбэлтэ. Продавец-консультанынан үлэлиир 24 саастаах куорат олохтооҕо аферистарга 650 000 солк. ыыппыт. Баан куттал суох буолуутун сулууспатын сымыйа үлэһитэ «Воробьев» бу продавец-консультаҥҥа түөкүттэртэн харчытын харыстыырга, тус счетун суһаллык уларытарыгар сүбэлээбит. Кыыс итэҕэйэн 250 тыһ.солк. кирэдьиит ылбыт уонна банкоматынан араас нүөмэрдэргэ ыыппыт. Сарсыҥҥы күнүгэр «Воробьев» түөкүттэр дьайыылары оҥорууларын эмиэ хатылаабыттарын иһитиннэрбит уонна аны, атын баантан 400 000 солк. кирэдьиит ылан ыытарыгар эппит. Түөкүннээччи онно да сөп буолбатах. Кыыс бааҥҥа үһүстээн кирэдьиит ыла тиийбитигэр, аккаастаабыттар. Сымыйа «үлэһиттэр» төлөпүөнүнэн түөкүттэр сайаапкалара тохтотуллубутун, сарсын тус счета уларыйыаҕын эппиттэр. Бириэмэ ааспытын кэнниттэн, түөкүттэргэ албыннаппытын өйдөөн полицияҕа тыллаабыт.
«Ытыктабыллаах гражданнар, өскөтүн эһиэхэ билбэт дьоҥҥут баан үлэһиттэрэбит диэн төлөпүөннээтэхтэринэ уонна эһиги ааккытыгар ким эрэ крэдьиит ыла сатаабытын иһитиннэрдэхтэринэ, каартаҕыт дааннайдарын этэргитигэр, харчыгытын  туспа «куттала суох счекка» көһөрөргө, ону таһынан «харчыгытын харыстыыр туһуттан «утары» кирэдьиит ыларгытыгар «сүбэлээтэхтэринэ» итэҕэйимэҥ!
Баан үлэһитэ хаһан даҕаны эһигиттэн каартаҕыт уонна СМС-нан  кэлбит коду, баан каартатын нүөмэрин ыйыппат. Түөкүттэр эрэ итинник ыйыталлар», — диэн РФ ИДьМ Саха сиринээҕи управлениетын пресс-сулууспата иһитиннэрэр, сэрэтэр.
+1
0
+1
0
+1
0
+1
0
+1
0
+1
0
+1
0