Дьокуускайга “Строительнай” ырыынакка муус устар 2-4 күннэригэр Уус Алдан улууһун олохтоох табаары оҥорон таһаарааччыларын быыстапката буола турар.
Улуустааҕы култуура управлениетын кылаабынай исписэлииһэ Мотрена Герасимова иһитиннэрбитинэн, уран тарбахтаахтар Туймаада хочотун олохтоохторугар босхо маастар-кылаастары биэрбиттэр. Кылтан-сиэлтэн өрүүгэ, чороону оҥорорго, таҥас кырадаһыныттан кыбытыылаах, тииҥ кутуругуттан моойторугу тигиигэ, оҕуруону аанньыыга дьон-сэргэ үөрэ-көтө үөрэммит.
Суоттутааҕы техникум устудьуоннара тимири иһэрдэн оҥорбут эҥинэ бэйэлээх оҥоһуктарын, чочуйбут саха быһахтарын, киэргэллэрин сөҕө-хайгыы көрөөччү, сүбэлэтээччи үксээбит. Онтон оскуола үөрэнээччилэрин минньигэс астарын, бэйэ сиригэр-уотугар үүнэр оттортон чэйдэрин куорат дьоно хамаҕатык атыыласпыттар. Кэпэрэтиип аҕалбыт үрүҥ аһыгар, эриллибит этигэр тиксиэн баҕалаах элбээбит.
Тэрээһиҥҥэ улуус баһылыга Алексей Федотов, биир дойдулаахтара, бу ырыынагы салайааччылар Иван Данилов, Афанасий Заболоцкай ыалдьыттаабыттар. Улуус урбаанньыттара, норуот маастардара, тыа хаһаайыстыбатын кэпэрэтиибэ, агрооскуолалар кыттыбыттар.
Быыстапкаҕа сылдьыбыттар иис, уус албастарыгар үөрэнэн, сибиэһэй аска-үөлгэ тиксэн абыраммыттар.
Биһиги корр., “Саха сирэ”, edersaas.ru