Сахабыт сирин устуоруйатыгар аан бастаан Дьокуускай куорат мээринэн кэрэ аҥаар – Сардаана Авксентьева талылынна. Үгүс дьоҥҥо, оннооҕор Киин быыбардыыр хамыыһыйа салайааччытыгар Элла Памфиловаҕа эрдэттэн күүтүллүбэтэх соһуччу түгэн таҕыста.
edersaas.ru
Быыбар буолара аҕыйах хонук иннинэ батсаап ситиминэн Сардаана Владимировнаны үрүҥ водоэмульсионнай кыраасканан саба ыспыт хаартыскалара киэҥник хас бөлөх аайы тарҕаммыта. Дьэ, итиччэ абааһы көрөр эрээри, быыбардааччылар киниэхэ куоластарын тоҕо биэрдилэр?
Бастатан туран, 2000 сыллар саҕаланыахтарыттан Куорат мунньаҕын харыс да халбарыйбакка салайан олорбут Александр Саввиновы утарар санааларыгар куоластарын атын киһиэхэ биэрдилэр. Сүүрбэччэ сыл кэриҥэ биир сиргэ үлэлиир үчүгэй эрээри, бэлиитикэ хонуутугар биир сирэйтэн дьон салҕан, сылайан хаалар. Ил Дархан уларыйбытын кэннэ былаас бары ситимигэр эдэримсийии бара турар. Билигин былааска эдэр дьон тахсар кэмнэрэ кэллэ. Ол салгынын ухханыгар оҕустаран, быыбардааччы саҥа сэргэх сирэйи талыан баҕарар.
Иккиһинэн, «Виктория» миэбэл маҕаһыыннарын сайдыыга дириэктэрэ Владимир Федоров социальнай ситимнэргэ тарҕаммыт, кинини хараардар сыаллаах бөрүкүтэ суох иһитиннэрии кэнниттэн Дьокуускай баһылыгын кириэһилэтин туһугар киирсэн иһэн суол ортотугар тохтоон хаалбыта. Дьиҥэр, кини элбэх куолаһы ылар кыахтаах этэ. Ол эрэн, куораппыт биири биэс оҥорор талааннаах урбаанньыт илиитигэр киирэн, маҕаһыыннара өссө элбээн-тэнийэн иһиэхтэрэ, Дьокуускай барыта кини сиэбин иһигэр киириэ диэн дьааххаммыт буолуохтаахтар. Бу санааттан өссө 90-ус сыллартан Федоров туох баар айыытын-харатын барытын санаан, кэргэнэ Виктория харчыны хайдах эргитэрин, маҕаһыыннарын иэннэрэ ыйыллыбыт квадратнай миэтэрэ таһынан тахсан туралларын, нолуокка иэстэрэ кэмигэр төлөммөтөҕүн барытын сырдаппыт этилэр.
Маннык ис хоһоонноох бассаабынан тарҕаммыт сонун төһөтө кырдьыгын-сымыйатын ким да быһаарса барбатаҕа эрээри, Владимир Федоров киин куорат баһылыгар киирсэр быыбартан тута туораабыта. Онтон Сардаана Авксентьеваны өйүүрүн биллэрбитэ. Итинник икки күүс түмсэн, уопсай сыал-сорук туһугар киирсибиттэрэ.
Үсүһүнэн, Александр Саввинов туһугар дьон дьиҥэ куоластыахтарын эмиэ whats upp ситиминэн аны кини айыытын-харатын ырытан, хас кэргэнин, уол оҕотун аайы элитнэй кыбартыыра, дьиэ-уот, учаастак ылан биэрбитин арыйар сонун, бэл дьиэлэрин аадырыһын ыйан туран бэрт түргэнник тарҕаммыта. Илья Михальчук кэмигэр «Лена» гостиница буор-босхо Саввинов аатыгар суруллан, хаһаайыныгар сүүһүнэн мөлүйүөн дохуот киллэрэрин кытта ахтыбыт этилэр.
Сүрүн хандьыдаат кимин-тугун арыйыы кэнниттэн Сан Саныч быыбарга киирсииттэн туораабатаҕа. Этэргэ дылы, «До победного конца» киирсибитэ даҕаны, быыбар түмүгүнэн, хомойуох иһин, кыайыы кини диэки буолбата.
Үгүс дьон соһуйуон иһин, Александр Саввиновтан 10% элбэх куолаһы ылан, Сардаана Авксентьева куораппыт саҥа баһылыга буолла. Кини соччо биллибэт саҥа баартыйаттан турбута эмиэ да сүүйүүлээх буолан биэрдэ. Үгүс дьон биэнсийэҕэ тахсар сааһы уһаппыттарын кэнниттэн ньыгылларга итэҕэйэллэрэ сыыйа аччаан эрэр. Оттон Сардаана Владимировна кинилэри өйүүрүн көрдөрбөтө. Дьахтар быһыытынан олус муударайдык кииристэ уонна быыбар бүтэһик кирбиитигэр «Виктория» миэбэл маҕаһыыннарын дириэктэригэр Владимир Федоровка бэриллиэхтээх куолас барыта киниэхэ эбилиннэ. Онон бонус курдук очукуота икки бүк улаатта.
Дьокуускай саҥа баһылыга, кини кимий? Чурапчыттан төрүттээх Сардаана Авксентьева урукку өттүгэр Гоголева диэн араспаанньатынан биллэр этэ. Икки үрдүк үөрэхтээх: 1993 с. СГУ историко-юридическэй факультетын, 1998 с. «Государственнай уонна муниципальнай салайыыга» Уһук Илин госсулууспаҕа академиятын бүтэрбитэ.
Киин куорат дьаһалтатыгар үлэтин 1993 с. ыччат, спорт, физическэй култуура салаатыттан саҕалаабыта. Онтон ыччат министиэристибэтигэр, Саха НКИК тэрийэр уонна каадыры кытта үлэтигэр начаалынньык буолбута.
2000 с. Госдуума дьокутаата Виталий Басыгысов көмөлөһөөччүтэ.
2004-2007 сс. «Туймаада Даймонд» хампаанньа генеральнай дириэктэрин солбуйааччыта.
2007 с. Юрий Заболев куорат баһылыгынан үлэлиир кэмигэр дьаһалта аппараатын салайааччыта, баһылык солбуйааччыта. Бу кэмҥэ «Терминатор», «Тимир Леди» диэн ааттаммыта.
2012 с. саҥа хамаанда кэлбитигэр куорат дьаһалтатыттан барбыта. Дьокуускай аэропуордугар «Аэроторгсервис» дириэктэринэн үлэлии сылдьан быыбарга соһуччу кыайан, 2018 с. Дьокуускай баһылыгынан кыайыылаахтык төннөн кэллэ.
Онон, куорат историятыгар аан бастаан кэрэ аҥаар салайааччыланныбыт. Эҕэрдэлиибит! Кини кэмигэр тапталлаах Дьокуускай куораппыт хайдах сайдан иһэрин бириэмэ көрдөрүө.
Марианна Тыртыкова, «Саха сирэ», edersaas.ru