Дьокуускай куорат 388 сааһын туолар күнүгэр Ил Дархан Айсен Николаев храмҥа баран бырааһынньыктааҕы мэлиэбэҥҥэ кыттыыны ылла.
Мэлиэбэҥҥэ Дьокуускай олохтоохторун тустарыгар мэлииппэ ааҕылынна, “Умиление Градоякутская” Боҕоруодьусса иконатыгар үҥүү, махтаныы буолла. Дьокуускайдааҕы, Ленскэйдээҕи архиепископ Роман бырааһынньыгынан эҕэрдэлээтэ, төрөөбүт куораппытыгар ил-эйэ, этэҥҥэ буолуу чэчирии турарыгар баҕарда.
— Дойдубут хотугулуу-илиҥҥи өттүгэр саамай кырдьаҕас куорат 388 сылынан барыгытын эҕэрдэлиибин. Дьокуускай историята православие историятын кытары быстыспат ситимнээх. Православнай дьон кэлэн, остуруок тутан, куораты олохтообуттара. Дьокуускайбыт ирбэт тоҥҥо турар саамай бөдөҥ куорат буолар, хас биирдии олохтооҕун дьылҕатыгар бэлиэ суолун хаалларар, — диэн Айсен Николаев эттэ.
Куорат күнүгэр социальнай эбийиэктэр: Ю.Гагарин аатынан култуура, аныгы искусство киинэ, 203-с түөлбэҕэ аныгылыы уһуйаан, Дьаамсыктар сквердэрэ уонна тутулла турар Кыайыы пааркатыгар стела тутуллубуттарын кини бэлиэтээтэ.
Ангелина Васильева, “Саха сирэ” хаһыат, edersaas.ru