Ил Түмэн дьокутаата Иван Шамаев дириэктэрдээх өрөспүүбүлүкэтээҕи лицей-интэринээт үөрэнээччилэрин төрөппүттэрэ соторутааҕыта оскуола историятыгар аан маҥнай Аҕа түмсүүтүн тэриннилэр. Салайааччынан Альберт Соровы таллылар. Түмсүү үлэтин ааспыт өрөбүл күн Нам улууһун Модут нэһилиэгэр тахсан, муҥхаттан саҕалаата.
Бу бэртээхэй тэрээһини быйылгыттан Нам улууһунааҕы киин балыыһа кылаабынай бырааһынан үлэлии сылдьар Аҕа түмсүүтүн биир көхтөөх чилиэнэ Иван Иванович Замятин Модут нэһилиэгин кырдьаҕас муҥхаһыта Егор Иванович Колмогоровы кытта кэпсэтэн сүрүннээтэ. Муҥхаҕа барыта 38 оҕо 85 улахан киһини кытта сырытта.
Күөх Боллох тойон саҥа дьону атыҥыраабата: куул быһаҕастыытынан собо-быччыкы кэһиилээн ыытта. Онон оччугуйдуун-улаханныын дьиэлэригэр-уоттарыгар илии тутуурдаах эргилиннилэр. Куорат оҕолоро өбүгэбит быдан былыргыттан илдьэ кэлбит үгэһин – муҥхалааһыны уу харахтарынан көрдүлэр-иһиттилэр, өссө обургу өттүлэрэ күнү быһа нырыыга сылдьаннар, тириттилэр-хоруттулар.
Аҕа түмсүүтүн салалтата манан уоскуйар санаата суох: аны саас куйуурунан, сайын илиминэн балыктааһыҥҥа уолаттары уһуйар былааннаах.
Василий НИКИФОРОВ, «Саха сирэ»хаһыат, edersaas.ru