Быйыл 75-с төгүлүн ыытыллыбыт “Якутия” хаһыат бирииһигэр чэпчэки атлетика эстэпиэтэтигэр 840 киһи кытынна. Оскуолалар, үрдүк, орто үөрэх кыһаларын, үлэ кэлэктииптэрин хамаандалара, үгэс курдук, уон түөрт түһүмэхтэн турар 7 биэрэстэ 800 миэтэрэ уһуннаах сиргэ куорат киин уулуссаларынан илин-кэлин түһүстүлэр.
Бастакы бөлөххө 21-с №-дээх оскуола бэһис сылын субуруччу бастаата. 33-с уонна 31-с оскуолалар иккис, үһүс буоллулар. Иккис бөлөххө куораттааҕы национальнай гимназия, өрөспүүбүлүкэтээҕи лиссиэй-интэринээт, “Айыы кыһата” национальнай гимназия хамаандалара бириистээх миэстэлэри ыллылар. Үһүс бөлөххө 6-с уонна 18-с оскуолалар кыайыылааҕынан таҕыстылар.
Орто үөрэх кыһаларын ортотугар Дьокуускайдааҕы тыа хаһаайыстыбатын техникума бастаата. Медицинскэй уонна художественнай училищелар хамаандалара иккис, үһүс бириистээх миэстэлэри ыллылар.
Үрдүк үөрэх кыһаларыгар ХИФУ физико-техническэй институтун устудьуоннара биэтэккэ бастакынан кэллилэр. Спорт институтун бастакы хамаандата иккис көрдөрүүлэннэ. Үһүс миэстэҕэ Роман Дмитриев аатынан олимпийскай эрэл училищета таҕыста.
Үлэ кэлэктииптэрин бөлөҕөр “Динамо” уопсастыба быһыйдара иннилэригэр кими да түһэрбэтилэр. Дьокуускай куорат спорка управлениетын уонна ХИФУ үлэһиттэрин хамаандалара иккис, үһүс буоллулар.
Икки сүүрүү бастакы түһүмэхтэригэр бастыҥ көрдөрүүлэммит 21-с №-дээх оскуола быһыйа Николай Кулачиков уонна 5-с №-дээх оҕо спортивнай оскуолатын преподавателэ Роман Алексеев харчынан бириистэринэн биһирэннилэр.
Кыайыылаах уонна миэстэлэспит хамаандалар Дьокуускай куорат дьаһалтатыттан мэтээллэринэн, кубоктарынан, “Сахамедиа” медиахолдинг бириистэринэн бэлиэтэннилэр.
Роман ПОПОВ, “Саха сирэ” хаһыат, edersaas.ru