Саха Өрөспүүбүлүкэтигэр Роспотребнадзор управлениета иһитиннэрбитинэн, ахсынньы 5-15 күннэригэр 21 киһи (19 улахан киһи уонна 2 оҕо) куорунан ыалдьыбыта бэлиэтэннэ.
Ыалдьыбыт дьон үгүстэрэ урут куорунан ыалдьыбатахтар, харыстанар быһыыны ылбатахтар эбэтэр быһыыны биэрии схемата кэһиллибит.
Билигин кинилэртэн 16 киһи эмтэнэ сылдьар, биэс киһи үтүөрэн балыыһаттан таҕыста.
Роспотребнадзор управлениета санитарнай-эпидемиологическай чинчийиини салгыыны ыытар. Доруобуйа харыстабылын министиэристибэтин уонна эмтиир тэрилтэлэри кытары ыарыы өрө туруутун утарсар эбии дьаһаллар ылыллаллар.
Бастатан туран, хантаактаах дьону (4,6 тыһыынчаттан тахса) барыларын 21 күн устата кэтээн көрөллөр.
Манна даҕатан эттэххэ, ыарыһахтар балыыһаҕа киириилэрэ маассабай буолар түбэлтэтигэр, эмтиир тэрилтэлэр бэлэм буолаллара хааччылынна. Куору утары 13000 вакцинаны уонна 900 устуука иммуноглобулины атыылаһарга үп көрүлүннэ.
Ыарыыны утары быһыыны ылаллар:
— 1-6 саастаах оҕолор;
— 55-гэр диэри саастаах улахан дьон;
— куорунан ыалдьыбатах дьон;
— быһыы ылбатах дьон;
— быһыы ылбыттарын туһунан сибидиэнньэлэрэ суох дьон;
— быһыыны биирдэ ылбыт дьон.
Ыарыыны сэрэтэр быһыылар федеральнай бүддьүөт суотугар босхо олорор сиргинэн эмтиир тэрилтэлэргэ бэриллэллэр.
Баар балаһыанньаны СӨ Роспотребнадзорун управлениета ураты хонтуруолга тутар.
Надежда ЕГОРОВА, “Саха сирэ”, edersaas.ru