Бу күннэргэ Өрөспүүбүлүкэтээҕи кулгаахтарынан истибэт анал (коррекционнай) интэринээт-оскуола үөрэнээччилэрэ Санкт-Петербург куоракка ыытыллыбыт “Искусство планетата – аан дойду норуоттарын айар үлэтэ” диэн норуоттар икки ардыларынааҕы бэстибээл-куонкуруска баран 9 миэстэлээх кэллилэр. Онон Кыайыы күнүн кыайыылаах көрүстүлэр.
edersaas.ru
Куонкурус олус үрдүк таһымнаахтык ааспыт, Кытай, Корея, Германия, о.д.а. курдук улахан дойдулартан тиийэ кэлэн кыттыбыттар. Саха сириттэн аҥаардас тустаах оскуола үөрэнээччилэрэ баран үс Гран-при, биэс 1-кы истиэпэннээх лауреат, биир 2-ис истиэпэннээх лауреат үрдүк аатын ылан кэлбиттэр. Биир оскуола холугар баһырхай ситиһии! Оскуола дириэктэрин иитэр үлэҕэ солбуйааччы, дэлэгэссиэйэ салайааччыта Иван Сухардинов иһитиннэрбитинэн, оҕолор туох даҕаны чэпчэтиитэ суох улахан дьону кытта тэҥҥэ күрэхтэспиттэр. Оҕолор кулгаахтарынан букатын истибэттэрин куонкурус кэнниттэн эрэ билэн, улаханнык соһуйбуттар. Оҕолор хамсаныыларыгар муусуканы ол курдук истэн, дууһалыранын, сүрэхтэринэн ылынан, бары биир киһи курдук тэҥник, сатабыллаахтарын толорбуттарын бэлиэтээбиттэр. Биллэн турар, маннык улахан кыайыы бүтүн кэлэктиип сыралаах үлэтинэн, төрөппүттэр өйөбүллэринэн, оҕолор дьаныардаах дьарыктарынан ситиһиллэр.
Иитиллээччилэр оскуолаларыттан харыс даҕаны халбарыйбакка, үөрэхтэрин кыһатын иһинэн ыытыллар куруһуоктарга сылдьаллар эбит. Ол курдук, оҕолору кэрэ эйгэтигэр үгүс салайааччылар уһуйаллар. Салайааччы Наталья Герасимова иитиллээччитэ, 10 кылаас үөрэнээччитэ Люба Пахомова “Десятый батальон” ырыанан вокал-соло номинацияҕа Гран-при үрдүк аатын ылбыт.
Декоративнай-прикладной искусство номинацияҕа Гран-при хаһаайынынан буолбут Юра Павлов сахалыы мас кытыйаны уонна ньуоска наборун үлэ уруогар оҥорбут. Салайааччыта Игорь Лугинов кэпсииринэн, Юра үгүс куонкурустарга кыттан миэстэлэһэр эбит.
Эмиэ оскуола иһинэн үлэлиир “Чаҕыл” муода тыйаатыра өссө 2007 сыллаахха тэриллибит. Юлия Алексеева, Александра Сергучева үөрэтэр оҕолоро “Туос ырыа” кэллиэксийэлэринэн Гран-при ааты ылбыттар. Куруһуокка оҕолор туостан, тирииттэн, оҕуруонан араас кэрэ киэргэллэри, сувенирдары оҥорон таһаараллар, иистэнэллэр.
Оскуола 2012 сыллаахха тэриллибит “Поющие сердца” ансаамбылынан (сал. Наталья Герасимова) киэн туттар. Оскуола дириэктэрэ Оксана Винокурова: “Ансаамбыл биһиги оскуолабыт брендэ буолар. Оҕолорбутун муусука искусствотыгар сыһыарар”, — диэн бэлиэтиир. Онтон салайааччы Наталья Герасимова оҕолор элбэх куонкурустарга кыттан кыайалларын, өрүү миэстэлэһэллэрин ыйар. Бу кыайыылар кинилэргэ дьолу, үөрүүнү бэлэхтииллэрин, салгыы сайдалларыгар тирэх буоларын чорботон этэр. Үҥкүүгэ кыттар көстүүмнэрин оҕолор салайааччыларын кытта бэйэлэрэ тигэллэр эбит.
Бу куонкуруска Лена Габышева уонна Дима Омукчанов (сал. Н.П.Герасимова), “Сандаар” үҥкүү бөлөҕө (сал. С.В.Софронова), Валерия Соловьева, Саша Бетюнскай (сал. Н.С.Кривошапкина), Юля Колосова, Валя Заиграева (сал. А.И.Сергучева) лауреат бастакы, иккис истиэпэннээх лауреаттарынан буолбуттар. Талааннаах оҕолор ити кыайыыларын барытын учуоттаан туран, Өрөспүүбүлүкэтээҕи кулгаахтарынан истибэт анал (коррекционнай) интэринээт-оскуола хамаандатыгар эрэ 10 тыһыынча солкуобай суумалаах сэртипикээти туттарбыттар.
Оҕолор үөрүүлэрэ муҥура суох. Үгүстэр Саха сирин тас өттүгэр маҥнай тахсар буолан харахтара уоттаммыт, кэпсээннэрэ элбэх. “Муусука — барыбытыгар” өрөспүүбүлүкэтээҕи бырайыак иитинэн оскуолаҕа “Веселые нотки” ансаамбыл үлэлиир. Манна иитиллээччилэр төһө даҕаны кулгаахтарынан истибэттэрин иһин, флейтаҕа оонньуурга холоноллор эбит. Аны күһүн Казаньҥа ыытыллыахтаах бэстибээлгэ бэлэмнэнэллэр.
Людмила ПОПОВА, “Саха сирэ” хаһыат, edersaas.ru
Хаартыскалар: оскуола архыыбыттан.