Арассыыйа Төрүт Сокуонугар уларытыылары киллэриигэ куоластааһынтан өрөспүүбүлүкэ дьоно-сэргэтэ туора турбат.
Бары улуустарга быыбардыыр учаастактар сарсыарда аҕыс чаастан арыллан үлэлии тураллар. Саха сирин Киин быыбардыыр хамыыһыйатын бэрэссэдээтэлин солбуйааччы Иван Андросов куоластааһын хаамыытын туһунан брифиҥҥэ маннык иһитиннэрдэ:
– Дойду Төрүт Сокуонугар уларытыылары киллэриигэ куоластааһын сиэрдээхтик, бары ирдэбили толору тутуһан ыытылларын туһугар 822 быыбардыыр учаастакка 860 кэриҥэ быыбардыыр хамыыһыйа чилиэннэрэ үлэлии-хамсыы олороллор.
Бүгүн күнүс 12 чаастаах туругунан, өрөспүүбүлүкэ үрдүнэн 286 тыһыынча 962 киһи, ол эбэтэр быыбардааччы 43,6 %-а куоластааһыҥҥа кытынна. Биирдиилээн улуустарынан көрдөххө, бырамыысаланнай оройуоннартан: Мииринэйгэ 20 225 киһи (37 %), Нерюнгрига 19 838 киһи (34,7 %), тыа сирин улуустарыттан: Тааттаҕа 7 701 киһи (70,6 %), Үөһээ Бүлүүгэ 8 823 киһи (70,1 %), хотугу улуустартан Орто Халымаҕа 3 292 киһи (50 %) куоластааннар, Төрүт Сокуоҥҥа уларытыылары киллэриигэ бэйэлэрин санааларын биллэрдилэр. Мантан киэһэ куоластааһын өссө көхтөөх буолуоҕа.
Раиса Сибирякова, «Саха сирэ» edersaas.ru