Уус Алдан улууһун 584-дээх Тумуллааҕы куоластыыр учаастак бэс ыйын 25 күнүгэр үлэтин үчүгэй тэрээһиннээхтик саҕалаан олорор. Манна 7 киһи үлэлиир. Дьон кэлэн куоластыыр, бэйэтин санаатын биллэрэр.
—Биһиэхэ 419 киһи испииһэккэ баар. Улууспут дьаһалтата дезинфекциялыыр сириэстибэлэринэн, бэрчээккилэринэн, мааскаларынан, уруучукаларынан толору хааччыйда. Онон, санитарнай инвентарынан хааччыллыыбыт үчүгэй, барыта баар. Дьон куоластыыр учаастакка киириитэ уонна тахсыыта барыта ирдэбилгэ эппиэттиир. Аҕам саастаах, самоизоляцияҕа олорор дьоҥҥо дьиэлэригэр баран куоластатабыт, — диэтэ хамыыһыйа бэрэссэдээтэлэ Анна Михайловна ПАРНИКОВА.
Тумуллар тэрээһиннэрэ чахчы үчүгэй буолла. Ону олохтоох дьаһалта саҥа кварцевай лаампанан, иһэр уунан, биирдэ туттуллар ыстакааннарынан, эмиэ итинник туһаныллар соттордорунан уонна мыыланан толору хааччыйбыта ону эмиэ туоһулуур.
Күн иккис аҥаарыгар хамыыһыйа чилиэннэрэ аҕам саастаах дьоҥҥо дьиэлэринэн сылдьан куоластаттылар.
Татьяна МАРКОВА.