Бүгүн СӨ Бэрэсидьиэнин уонна Бырабыыталастыбатын дьаһалтатын салайааччы Афанасий Владимиров Таатта, Чурапчы уонна Мэҥэ Хаҥалас улуустарын муниципальнай тэриллиилэрин баһылыктарын кытта Бүтүн Арассыыйатааҕы куоластааһыны ыытыыга бэлэмнэнии боппуруоһугар сүбэ мунньаҕы ыытта.
edersaas.ru
Нэдиэлэ устата ыытыллыбыт маннык хабааннаах сүбэ мунньахтарыгар өрөспүүбүлүкэ 34 оройуонун 315 нэһилиэктэрин баһылыктара, СӨ быыбар киин хамыыһыйатын чилиэннэрэ, бэрэссэдээтэллэрэ уонна территориальнай быыбар хамыыһыйаларын чилиэннэрэ кытыннылар. Хас биирдии нэһилиэк тыҥааһыннаах кыһалҕалара, тиийэр суола-ииһэ, сибээстэһэр ханаалларын хаачыстыбата уонна информацияны тарҕатыы боппуруостара көрүлүннүлэр.
Куоластааһыны ыытыы сүрүн соругунан куоластааччылар, быыбардыыр хамыыһыйалар уонна кэтээн көрөр хамыыһыйалар чилиэннэрин доруобуйаларыгар куттал суох буолуутун хааччыйыы буолар. Ону таһынан, дьон болдьохтоох куоластааһын кэмиттэн эрдэ куоластааһыннарын, республика таһыгар баар гражданнар куоластааһыннарын сөптөөх тэрийии уонна куоластааһын сирдэригэр информационнай-өйдөтөр үлэни тэрийии ырытылынна.
Афанасий Владимиров «Мобильный избиратель» нөҥүө быыбардааччы баар сириттэн куоластыылларын туһунан сайабылыанньаны биэриигэ ордук табыгастаах ньыма буоларын туһунан нэһилиэнньэҕэ тиэрдээһин үлэ ыытыллыахтааҕын туһунан тоһоҕолоон эттэ. Санатан эттэххэ, сайабылыанньаны тутуу МФЦ «Мои документы» уонна территориальнай быыбардыыр хамыыһыйалар нөҥүө бэс ыйын 5 күнүттэн бара турар. Учаастактааҕы быыбар хамыыһыйалара сайабылыанньалары бэс ыйын 16 күнүттэн тутуохтара.
«Саха сирэ» хаһыат, edersaas.ru