Бэс ыйын 3 күнүгэр улуус Аҕа баһылыга Анатолий Григорьев уонна тыа хаһаайыстыбатын управлениетын салайааччыта Иван Тихонов Куокуну, Кириэстээх уонна Тойбохой нэһилиэктэрин бааһыналарын көрдүлэр-иһиттилэр.
edersaas.ru
Куокуну нэһилиэгэр «Көнүс үрдэ» диэн 130 га бааһынаҕа былырыын кэлбит 3 саҥа тыраахтар сири чөлүгэр түһэрии үлэтин ыытар. Өрөспүүбүлүкэ биллиилээх механизатора, Кыһыл Знамя уонна Ленин уордьанын кавалера, САССР норуотун хаһаайыстыбатын үтүөлээх үлэһитэ Клавдий Михайлов билиҥҥи кэмҥэ аныгы тиэхиньикэлэринэн үлэлиир таһаарыылааҕын, үлэ тэтимин түргэтэтэрин бэлиэтээтэ. Кини 1976 сыллаахха сезон устата 19 күн соҕотоҕун комбайнынан 750 га сири хорутан өрөспүүбүлүкэҕэ рекорд олохтообута. Билигин маннык тиэхиньикэ биир күн иһигэр 100 га бааһынаны хорутар.
Салгыы «Бүөр-Күөл» сайылыгар сылдьыы буолла. ТХПК «Крестях» бэрэссэдээтэлэ Владимир Егоров иһитиннэрбитинэн, манна сүөһү мэччирэҥ сирдэрэ киэҥ уонна элбэх буолан 2019 сыллаахха сайылыктааһын гранын ылан 220 төбө ыанар ынахха сайыҥҥы ыанньык тутуллубут.
250 ньирэй турар саҥа титииктэри туппуттар. Билигин хаһаайыстыба уопсайа 124 ньирэйдээх, онно 3 ньирэй көрөөччү үлэлиир. Сайылыкка барар суолу иллэрээ сыл оҥотторбуттар, онтон быйыл сорох сирдэрин көннөрө сылдьаллар. Инникитин күрүөлээһин уонна сайылыкка олорор үлэһиттэр дьиэлэрин өрөмүөннээһин үлэтин былаанныыллар.
ТХПК «Крестях» Куокунутааҕы салааларыгар олус улахан үлэлэр барбыттар, ол курдук былырыын 120 төбө киирэр саҥа механизированнай хотон тутуута саҕаламмыт, быйыл бүтэн үлэҕэ киириэхтээх.
«Сунтаар улууhа (оройуона)» муниципальнай оройуон дьаһалтатын пресс – сулууспата