“Күһүҥҥү киһи күлбүтүнэн» диэн мээнэҕэ этиллибэт. Кэбээйи улууһун Куокуйугар күһүҥҥү дьаарбаҥка бэрт көхтөөхтүк буолан ааста.
Нэһилиэк оҕуруотчуттара помидор, оҕурсу, биэрэс, хаппыыста араас суортарын, ону ааһан бэл, гороҕу, арбуһу, тыкваны, дьэдьэни үүннэрэллэр. Онон, дьаарбаҥкаҕа кэлбиттэр ким сөҕөн-махтайан, ким уопут атастаһан, ким атыылаһан сүргэлэрэ көтөҕүлүннэ, уочарат, анньыһыы да баар буолла. Түмүккэ бастыҥ оҕуруотчут аатын Екатерина Лукина ылла, кэнсиэрбэлээһиҥҥэ Оксана Игнатьева, саамай бөдөҥ оҕуруот аһыгар Любовь Степанова уо.д.а. кыайыылаахтарынан буоллулар. Даҕатан эттэххэ, Оксана Игнатьева быйыл 80 куул хортуоппуйу үүннэрбит, атын оҕуруот аһын эмиэ элбэҕи хомуйбут. Маны таһынан, көмүс күһүнү хоһоонунан, хаартысканан дьүһүйүү күрэҕэ ыытылынна, култуура дьиэтин үлэһиттэрэ бэртээхэй кэнсиэри бэлэхтээтилэр. Онон куокуйдар быйыл бэркэ оттообуттарын таһынан, оҕуруот да аһын хоточчу үүннэрбиттэр. Дьэ, бу буолар тыа киһитэ сыралаах үлэтин түмүгэр дуоһуйууну ылара, үөрэрэ-көтөрө! Көмүс күһүн бэлэхтэрин көрөн-истэн, амсайан, дьаарбаҥкаттан дьон дуоһуйан, астынан тарҕастылар.
Куокуйтан Варвара Спиридонова, “Саха сирэ” хаһыат, edersaas.ru. сайтка анаан
