Ньурба улууһун Антоновка нэһилиэгин иһинэн “Куочай ыччата” диэн ыччат түмсүүтэ үлэлээбитэ иккис сыла буолла. Түмсүү быйылгы Ыччат сылын түмүгүнэн, “Ыччат сылын бастыҥ түмсүүтэ” номинацияҕа кыайыылаах таҕыста. edersaas.ru
Эрдэ “Куочай ыччатын” туһунан быйыл Мирнэйгэ ыытыллыбыт Ыччат ыһыаҕар ситиһиилээхтик кытыннылар диэн суруйан турардаахпыт. Онно уопсастыбаннай түмсүүлэр илин-кэлин түсүһүүлэригэр ХИФУ устудьуоннарын идэлээх сойууһун кэнниттэн иккис миэстэни ылары ситиспиттэрэ.
Түмсүү бэрэссэдээтэлинэн учуутал идэлээх Надежда Егорова үлэлиир. “Куочай ыччатын” үлэтин туһунан маннык кэпсиир:
— Түмсүүбүт 2016 сыллаахха тэриллибитэ. Ньурбаҕа Куочай диэн историяҕа киирбит, аар-саарга аатырбыт улахан сыһыы баар, ол аатынан “Куочай ыччата” диэн буолбуппут. Манна оскуола оҕолоруттан саҕалаан эдэр ыаллар, араас эйгэ үлэһиттэрэ, нэһилиэккэ айа-тута сылдьар ыччат саастаах дьон түмсэллэр. Биһиги нэһилиэкпит өрөспүүбүлүкэҕэ биир элбэх нэһилиэнньэлээх нэһилиэктэртэн биирдэстэрэ буолар. Онон, аҕыс түөлбэҕэ арахсабыт, сокуонунан регистрацияланан, “Союз микрозон села Антоновка” диэн ааттаах тэрилтэ буолар. 2015 сыл бүтүүтэ, ыччаттар түмсэн, “тоҕо бэйэбит түмсүүлэммэппитий?” диэн, тэринэн киирэн барбыппыт. Сыыйа-баайа үлэбитин саҕалаабыппыт. Бастаан үс ыалга көмө оҥорбуппут, социальнай хабааннаахтык үлэлээбиппит. Оттон быйыл “Ньурба” сопхуос үбүлүөйүнэн сибээстээн, “60 үтүө дьыала” диэн бырагыраама оҥорон үлэлээтибит. Нэһилиэкпит ыччатын лидерэ Илья Егоров салалтатынан “Үтүө дьыала чорооно” аахсыйа ыытыллыбыта. Маны таһынан, нэһилиэкпитигэр баар скверы сөргүппүппүт. Нэһилиэкпит сайдарын туһугар биир даҕаны ыччат туора туран хаалбакка, бары түмсүүлээхтик үлэлии-хамсыы сылдьабыт. Биһигини дьаһалтабыт өйүүрүттэн олус үөрэбит.
“Куочай ыччата” түмсүүнү ситиһиилэринэн эҕэрдэлиибит!
Айтана Аммосова, «Саха сирэ» хаһыат, edersaas.ru