Кумааҕынан аһаабаппыт да буоллар, сыана үрдээһинин мучумааныгар түбэһиннэрэн, бу да салаа хаалсыбата. Куоракка А4 кумааҕы 700 солк. лаппа тахсыбыт.
Үнүр биир билэр дьахтарым оҕотун учуутала: “Кумааҕыга сыана үрдээн эрэринэн, аны күһүн ирдэнэр оробуочай тэтэрээттэрбитин билигин атыылаһыаҕыҥ”, — диэн төрөппүттэргэ сорудахтаабыт итиэннэ тэтэрээттэр испииһэктэрин ыыппыт. Төрөппүттэр уталыппакка ол күн харчы хомуйан, баар тэтэрээттэри атыыласпыттар. Сороҕо бүппүт эбит.
Итини истэн А4 кумааҕы сыаната төһө буолбутун билсээри, чугас эргин кэнсэлээрийэ маҕаһыннарын кэрийдим. Итиэннэ көрбүппүн итэҕэйбэккэ олоробун. Билэрдии өрүү өҥөйөр маҕаһыыммар киирэн ыйыталаспыппын: “А 4 кумааҕы суох, кулун тутар сүүрбэтин кэнниттэн кэлэрэ буолуо. Сыаната төһөтүн билигин этэр кыаллыбат, бука, үрдүүрэ буолуо”, — диэн сэрэттилэр.
Иккис маҕаһыыҥҥа киирбитим баар эрээри, сыаната лаппа үрдээбит. “Снегурочка”, “SvetoCopy” кумааҕылар 799 солк., буолбуттар.
Үһүс маҕаһыыҥҥа маҥан илиистээх А4 кумааҕы бараммыт, ол оннугар хаатыгар 250 устуука киирэр суруйар кумааҕы баар эбит. “Дьон маны ылаллар. А4 хаһан кэлэрин, сыаната төһө буоларын билбэппит”, — диэн атыыһыттар быһаардылар.
Тоҕо үрдээбитин туоһулаһаары биир киэҥник биллэр маҕаһыыҥҥа төлөпүөннүү сылдьыбыппын: “Ый анараа өттүгэр саахары 50 солк. ылар этибит, билигин сорох маҕаһыыҥҥа букатын даҕаны суох. Сыана ханна баҕарар үрдүү турар”, — диэн хоруйдаатылар. “Кумааҕы Арассыыйаҕа оҥоһуллар буолбатах дуо, тоҕо үрдүүрүй?” — диэн ыйытыыбар күттүөннээх хоруйу ылбатым.
Кумааҕыга сыана үрдээбитин истэн, элбэх оҕолоох, үөрэнээччилэрдээх төрөппүттэр аны тэтэрээти хаһаанан эрэллэр диэн иһиллэр. Саахар, бурдук буолбат ини, кумааҕынан аһаабаппыт диэн уоскутунарбытыгар эрэ тиийэбит.
Людмила ПОПОВА, “Саха сирэ” хаһыат, edersaas.ru