Саҥа дьыл чугаһаан иһэр буолан, үгүс дьон бырааһынньыгы көрсүү биир көрүҥүнэн дьиэ кэргэннэринэн хаартыскаҕа түһэн үйэтитиини ааҕаллар.
edersaas.ru
Ньурба улууһун Үөдэй нэһилиэгин «Айылгы» кулуубун дириэктэрэ Надежда Аммосова, бибилэтиэкэрдэр Наталия Крылова уонна Анастасия Нестерович хаһааҥҥы да сыллааҕар быйыл кулууптарын уратытык киэргэттилэр.
Саҥа сылы көрсө үөдэйдэр хаартыскаҕа түһэн, өйдүү сылдьалларыгар анаан түөрт анал муннугу анаан киэргэтэн бэлэмнээтилэр. Бастакы муннугу сэбиэскэй кэми санатарын иһин «ретро-зона» диэн ааттаатылар. Сүүрбэһис үйэ 70-80-c cыллардааҕы истиэнэ көбүөрэ, тыыннаах харыйа, Саҥа дьыллааҕы аккырыыккалар, туумба, тэлэбиисэр, олохтоох араадьыйа — тыа ыалын оччотооҕу олоҕун санатар. Өссө сэбиэскэй кэмҥэ сөп түбэһэр таҥас-сап кытта бэлэмнэннэ.
Иккис муннукка аныгылыы хайысха — билигин киһи үксэ сөбүлүүр кыһыл өҥө баһыйар.
Үһүс зонаҕа — «Кыһыҥҥы остуоруйа». Манна кырыа кыһын — халлаан күөх өҥ «күннээтэ».
Саамай тупсаҕай быһыылаах төрдүс муннук, оҕолорго ананар. Манна сүүнэ улахан атах таҥаһын иһигэр киирэн, илиинэн тигиллибит араас быһыылаах үтүлүктэри кэтэн түһүөххэ сөп.
Кулууп үлэһиттэрэ оҥорбут бу дьиктилээхэй бэлэх-муннуктарыттан Үөдэй олохтоохторо Саҥа дьыл киэһэ арахсыахтара суоҕа.
Елена ПОТОЦКАЯ, «Саха сирэ» хаһыат, edersaas.ru