Билигин ис дьыала уорганнарын «КРС (крупный рогатый скот)» диэн ааттаах эпэрээссийэлэрэ ыытылла турар. Эпэрээссийэ кэмигэр Намныыр суолга кэлиҥҥи ааннара аһыллыбыт биир массыынаны уорбалаан тохтоппуттар.
Алтынньы 15 күнүгэр, киэһэ 18.15 мүн. Намныыр суол 25-с килэмиэтиригэр ГИБДД иниспиэктэрдэрэ «УАЗ» массыынаны тохтоппуттар. Уруулга Дьокуускай куорат 53 саастаах олохтооҕо олорор уонна биир аргыстаах эбит. Массыына кэлин ааннара аһаҕастара полицейскайдар болҕомтолорун тардыбыт.
Массыына иһин-таһын чинчийэн көрүү түмүгэр, ханнык эрэ кыыл эттэммит этин булбуттар. Сотору манна участковай боломуочунай Анатолий Аргунов тиийэн кэлбит. Киниэхэ бу дьон эти Тулагы олохтоохторуттан атыыласпыттарын туһунан кэпсээбиттэр.
Тулагыга тиийэн, маҕаһыын аттыгар ханан эт атыыласпыттарын ыйан биэрбиттэр уонна олохтоох уолаттар «УАЗ» массыынаттан туран атыылаан баран барбыттарын быһаарбыттар.
Ити кэмҥэ аны Дьокуускай куорат полициятын 3 №-дээх отделын начальнигын солбуйааччы Петр Ксенофонтов салайааччылаах суһал-силиэстийэлиир бөлөх уонна Кангалассы бөһүөлэк участковайа Владислав Кутугутов кэлбиттэр.
Бу тиийэн кэлбит бөлөх сотору кэминэн быһаарбытынан, «УАЗ» массыыналаахтартан биир эрэ киһи ити күн гараастан тахса сылдьыбыт. Ол киһи кэпсээбитинэн, кини үрэххэ уу ыла барбытыгар, онно хайа эрэ эр дьон сүөһү иһин сууйа сылдьарын көрбүт.
Ол сиргэ тиийэн, салааска суолун булбуттар уонна ол суолу батыһан, биир дьиэҕэ тиийбиттэр. Онно биллибитинэн, бу дьиэ хаһаайыттара сүөһүлэрин бэйэлэрэ өлөрбүттэр уонна кимиэхэ да атыылаабатахтар эбит. Онон, тутуллубут дьон сымыйалаабыта биллэн тахсыбыт.
Онтон полиция отделыгар кэлэн, суоппар кууркатын харытыгар хаан баарын уонна онно тиит көтөҕөтө сыстыбытын өйдөөн көрөн, Тулагыга тиит суоҕунан, Кангалассы ойууругар сыһыаннаах буолуон сөбүн быһаарбыттар.
Доппуруос кэмигэр тутуллубут суоппар билиммитинэн, кини атаһа «Дом рыбака» сынньалаҥ базатыгар урут администраторынан үлэлии сылдьыбыт киһи, Кангалассы тыатыгар кулунчугу булан өлөрөргө тыл көтөхпүт.
Полицейскайдар бу дьон массыынатын чинчийии кэмигэр сааны бастаан булбатахтар. Онтон дьуһуурунай чаас полицейскайа Нюргун Асекритов банаарынан радиатор эрэһээҥкитин сырдатан, капот анныгар саа омоонун өйдөөн көрбүт. Ону арыйан, регистрацияламматах 16 калибрдаах ТОЗ мааркалаах сааны, 43 ботуруоннаах батарантааһы уонна хааннаах икки быһаҕы булбуттар. Суоппар ГИБДД иниспиэктэрдэрин кытта кэпсэтэр кэмигэр, аргыһа сааны уонна ботуруоннары кытта быһахтары капот анныгар көһөрөн кистээбит эбит.
Сарсыарда 04.00 чааска ол кулунчугу өлөрөн эттээбит сирдэригэр тиийбиттэр. Онтон отделга кэлэн иккис киһиэхэ эттэммит кулунчук хаартыскаларын көрдөрбүттэригэр, бу уоруйах билинэригэр тиийбит.
Бу чахчынан РФ Холуобунай кодексатын 158-с ыст. 2-с чааһынан («уоруу») холуобунай дьыала тэриллибит. Кулунчук эттэммит этин хаһаайыттарыгар биэрбиттэр.
Бу туһунан СӨ ИДьМ-тын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыскалар уонна видео: СӨ ИДьМ-тын пресс-сулууспата.